Atyraýdyń 7 aýdan ákimi áleýmettik jelilerde halyqpen baılanysqa shyqty

ATYRAÝ. QazAqparat - Atyraý oblysynda memlekettik organ basshylarynyń áleýmettik jelilerdegi tikeleı efırleri 50 myńnan astam turǵyndy qamtydy. Nurlan Noǵaev turǵyndarmen keri baılanys arnalary týraly aıtty, - dep habarlaıdy Atyraý oblysynyń Óńirlik kommýnıkatsııalar qyzmeti.

Atyraýda oblys ákiminiń halyqqa esep berý kezdesýi bolyp jatyr. «Jaıyq» sport kesheninde eki myń adamnyń aldynda Nurlan Noǵaev «2018 jylǵy Atyraý oblysynyń áleýmettik-ekonomıkalyq damý qortyndylary» týraly baıandap, bıylǵy josparlardy aıtty.

Aımaq basshysynyń aıtýynsha, qazir Atyraý oblysynda memlekettik organdardyń turǵyndarmen keri baılanysyn ornatýǵa kóńil bólinip otyr.

«2017 jylǵy qyrkúıekte ashylǵan Telegramm qosymshasyndaǵy «Akımat Atyraýskoı oblastı» chat-kanaly turǵyndar arasynda suranysqa ıe. Búginge deıin kanalǵa 4 myńnan astam adam tirkelgen. Sońǵy monıtorıng pen taldaý qorytyndylary turǵyndardan 3500-ge jýyq ótinim túskenin kórsetti»,-dedi Atyraý oblysynyń ákimi.

Sonymen qatar, 2018 jyldyń qańtarynda «Atyraý Tsıfrlyq Qabyldaý» (ACQ) mobıldi qosymshasy iske qosyldy. Qosymshaǵa 4000-nan astam adam tirkelgen. Búginge deıin 1500-den astam ótinim tústi.

«Memlekettik organdar basshylary men aýdan ákimderi áleýmettik jelilerde Atyraý oblystyq ákimdiginiń resmı paraqshasy arqyly tikeleı jelige shyǵyp, turǵyndar aldynda esep berdi. Bul turǵyndarǵa úılerinen shyqpaı-aq onlaın tártipte suraq qoıyp, jaýap alýlaryna múmkindik berip otyr», -dedi Nurlan Noǵaev.

Aımaq basshysynyń aıtýynsha, Facebook, Instagram áleýmettik jelileri arqyly aqpan aıynan bastap 7 aýdan ákimi men 5 basqarma basshysy qalalyq bólimderimen birge tikeleı baılanysqa shyqqan. Tikeleı efırler eki aptada 50 myńnan astam turǵyndy qamtyp, 1000-ǵa jýyq suraq tústi.