Atyraýdy qalyń tuman basyp tur

ATYRAÝ. QazAqparat – Atyraý qalasyn qalyń tuman basyp tur. Osyǵan baılanysty polıtseıler kólik júrgizýshilerine eskertý jasady, dep habarlaıdy QazAqparat tilshisi.

Atyraý oblystyq polıtsııa departamentiniń málimetinshe, qolaısyz kún raıy joldardaǵy qozǵalysty qıyndatyp, qaýipti týdyrady.

«Tuman – jol-kólik oqıǵasyna sebepshi bolatyn aýa raıy qubylystarynyń biri. Mundaı kezinde basqa kólikterge deıingi araqashyqtyqty anyqtaý qıynǵa soǵady. Qarsy nemese qatarlas baǵytta kele jatqan kólikterdiń jyldamdyǵy durys baıqalmaıdy. Sondyqtan, tuman kezinde jolda júrý erejesine sáıkes aldaǵy kólikti basyp ozýǵa tyıym salynady. Tumanda kóliktiń alysqa jaryq túsiretin shamyn qosýǵa bolmaıdy. Bul tumanǵa túsken jaryqty kózge shaǵylystyrýy múmkin. Jaqyndy kórsetetin shammen qatar, fardyń tumanǵa qarsy jaryǵyn paıdalaný kerek. Tumanǵa qarsy artqy shamdy qosýdy umytpaǵan abzal. Bul gabarıttik shamnan jaryǵyraq janady. Ári kóliktierdi soqtyǵysýdan saqtaısyz. Jyldamdyqty azaıtyp, araqashyqtyqty barynsha alshaq ustaǵan jón», - dep habarlady departamenttiń baspasóz qyzmeti.

Polıtseılerdiń aıtýynsha, jol-kólik oqıǵalarynyń negizgi sebepteriniń biri – jol qozǵalysy erejelerin saqtamaý.

«Jyldamdyq rejımin arttyrý jáne manevrleý qaǵıdasyn buzý qaýipti sanalady. Tabıǵattyń qubylysy qozǵalysty qıyndatyp, apatqa ákelip soqtyrýy múmkin. Sol sebepten, aýa raıy qubylyp turǵan kezde alys saparǵa shyǵýdan bas tartqan jón. Jolǵa shyqqan jaǵdaıda, arnaıy qaǵıdalardy ustanýǵa, uqypty bolýǵa, kólikti júrgizý kezinde telefonmen sóılespeýge, qaýipsizdik beldigin taǵýǵa keńes beremiz. Osyndaı qarapaıym sharalar saqtalsa, jol qozǵalysyna qatysýshylardyń ómiri men densaýlyǵyna qaýip tónbeıdi», - dep málim etti departamenttiń baspasóz qyzmetinen.

Eske sala ketelik, buǵan deıin Atyraýda jyl basynan beri jol apatynan 24 adam kóz jumǵanyn jazǵan edik.