Atyraýdan salynyp jatqan joldyń jıegin jańbyr sýy shaıyp ketti

Atyraýdan Reseı shekarasyna deıingi aralyqta salynyp jatqan joldyń jıegin jańbyr sýy shaıyp ketti, dep habarlaıdy QazAqparat tilshisi.

Jańbyrdan keıin tas joldyń jıeginde shuńqyr paıda bolǵan. Osyǵan baılanysty «QazAvtoJol» UK» AQ Atyraý oblystyq fılıaly joldaǵy ahýaldy túsindirdi.

«Qazir respýblıkalyq mańyzy bar «Atyraý-Astrahan» avtomobıl jolynyń 853-893 shaqyrymy aralyǵynda qaıta jańǵyrtý jumystary júrip jatyr. Merdiger mekeme - «Sıne Mıdas» JShS. Birneshe kún tolassyz jaýǵan jańbyr sýy tas joldyń jıegin shaıǵan. Osyǵan baılanysty tapsyrys berýshiden merdiger mekemege qalypqa keltirý jumystaryn júrgizý týraly tapsyrma berilgen Beınejazbada kórsetilgen 156-shaqyrym tusyndaǵy joldyń jıeginde paıda bolǵan shuńqyrdy qalpyna keltirý jumysy júrgizilip jatyr», -delingen oblystyq fılıaldyń aqparatynda.

Qalpyna keltirý jumysyna qajetti tehnıka men materıal jetkilikti. Merdiger kompanııanyń jumysy tehnıkalyq qadaǵalaý mamandarynyń qatań baqylaýynda bolady.

Eske sala ketelik, budan buryn Atyraýdan Reseımen shekaraǵa deıingi joldy jóndeýge 18 mlrd teńge bólingenin habarlaǵan bolatynbyz.

«QazAvtoJol» UK» AQ Atyraý fılıalynyń dırektory Bolatbek Aıtbaevtyń málimetinshe, óńirde respýblıkalyq avtojol jelisi – 1126 shaqyrym.

«Bul óńir aýmaǵymen Reseıdiń Astrahan oblysynan Atyraý, Mańǵystaý oblystary arqyly Túrikmenstan Respýblıkasymen shekaraǵa deıingi, Oral-Atyraý jáne Aqtóbe-Atyraý baǵytyndaǵy jol ótedi. Bıyl respýblıkalyq joldardy damytýǵa 36 mlrd teńge bólindi. Onyń ishinde 18 mlrd teńge Atyraýdan Reseı Federatsııasynyń shekarasyna deıingi joldy rekonstrýktsııalaýǵa jumsalady. Qandyǵash – Maqat baǵytyndaǵy trassaǵa 7,9 mlrd, Oral-Atyraý jolyn rekonstrýktsııalaý úshin jobalaý smetalyq qujattama ázirleýge 300 mln teńge qaralyp otyr», -dedi Bolatbek Aıtbaev.