Atyraýdan Reseıge qatynaıtyn joldyń 9 shaqyrymy paıdalanýǵa berildi
Óńirlik kommýnıkatsııalar qyzmetiniń málimetinshe, Aqtóbe-Atyraý-Reseı Federatsııasynyń shekarasy baǵytyndaǵy respýblıkalyq avtojoldyń 824-833 shaqyrymyndaǵy bóligi kólik qozǵalysy úshin ashyldy.
Bul jol Atyraý oblysynan Reseı Federatsııasyndaǵy Astrahan oblysynyń shekarasyna deıin qatynaıdy. Kúre joldyń Atyraý oblysyna qarasty ýchaskesiniń uzyndyǵy 217 shaqyrymdy quraıdy.
Atalǵan joldy kúrdeli jóndeýden ótkizý Memleket basshysynyń nazzarynda tur. Jóndeý jumystary 2018 jyly bastalǵan. Jol jóndeý jumysy 4 ýchaskege bólingen. Bıyl Indýstrııa jáne ınfraqurylymdyq damý mınıstri Qaıyrbek Óskenbaev atalǵan joldy jóndeý jumystaryn eki ret kelip tekserdi.
«Atyraý oblysyna aıyna bir ret mindetti túrde kelýge ýáde bergen bolatynmyn. Basty maqsatym – óńirde júrgizilip jatqan jumystardyń sapasy men oryndalý merzimin jiti qadaǵalaý. Qazir oblys ortalyqtarynda da jol jóndeý jumystary júrgizilip jatyr. Osy saparymda sol jumystarmen de tanysýǵa týra keldi. Memleket basshysy óńirdegi kólik joldarynyń ahýalyna erekshe nazar aýdaryp otyr. Sondyqtan, biz atqarylyp jatqan jumystardy turaqty túrde árdaıym baqylaýda ustaımyz», - dedi Qurmanǵazy aýylynyń turǵyndarymen kezdesýde Qaıyrbek Óskenbaev.
Joldyń alǵashqy (824-833 shaqyrym) 9 shaqyrymyn quraıtyn bóligine tómengi qabat jabyndysy tóselgen. Sol sebepten, kólik qozǵalysyna ruqsat berildi.
«Jol tóseminiń eni – 9 metr, qalyńdyǵy – 57 santımetr. Joldy jóndeý jumystaryna 220 jumysshy men 163 arnaıy tehnıka tartylǵan. Joldyń boıynda ornalasqan eldi mekenderdiń tusyna mal ótetin ótkelder men avtobýs aıaldamalary, kólik turaǵymen qosa kópirler salynatyny josparlanǵan. Respýblıkalyq mańyzǵa ıe Aqtóbe-Atyraý-Reseı Federatsııasynyń shekrasy baǵytyndaǵy tas joldy qaıta jańǵyrtý jumystary 2018 jyly bastaldy. 2023 jyly tolyqtaı paıdalanýǵa berý josparlanyp otyr», - dep habarlady óńirlik kommýnıkatsııalar qyzmetinen.
Eske sala ketelik, budan buryn Qaıyrbek Óskenbaev Atyraýdan Reseıge deıingi jol qurylysyn teksergenin jazǵan edik.