Atyraýdaǵy130 aýyl jyldamdyǵy joǵary ınternetke qosyldy

ATYRAÝ. QazAqparat – Atyraý oblysynyń 130 eldimekeni keńjolaqty ınternet jelisimen qamtylǵan. Endi munaıly shahardaǵy birneshe shaǵyn aýdandaǵy ınternet jelisi jańartylady, dep habarlaıdy QazAqparat.

Oblystyq ındýstrııalyq-ınnovatsııalyq damý basqarmasy basshysynyń mindetin atqarýshy Qarlyǵash Bekbaeva málimetine súıensek, munaıly óńirde 153 eldimeken bar. Onyń ishinde «Talshyqty-optıkalyq baılanys jelileri tehnologııasy boıynsha aýyldyq eldi mekenderde ınternet jelisine keńjolaqty qoljetimdilikti qamtamasyz etý» jobasyna sáıkes 130 eldimekenge ınternet jelisi júrgizilgen.

«Atyraý oblysynda buǵan deıin 250-den astam turǵyny bar aýyldyq eldimekenderge ınternetke keńjolaqty qoljetimdilikpen qamtamasyz etý baǵdarlamasymen 7 eldimekenge ınternet jelisi júrgizildi. Bul – Inder aýdanynyń Jarsýat, Qurylys, Órken, Isataı aýdanynyń Naryn, Jańa Janbaı, Qurmanǵazy aýdanynyń Shaǵyrly, Ǵ.Álipov aýyldary. Atalǵan aýyldar Ksell baılanys operatorynyń 3G jáne 4G tehnologııasy boıynsha mobıldik ınternetpen qamtamasyz etildi. Al, byltyrǵy jeltoqsan aıynda Qurmanǵazy aýdanynyń Jambyl jáne Afanasev eldimekenderi ınternet jelisine qosyldy», -dep habarlady Qarlyǵash Bekbaeva.

Onyń aıtýyna qaraǵanda, bıyl Atyraý qalasyndaǵy birneshe shaǵyn aýdanynda keńjolaqty ınternet jelisi jańartylady. Naqtylaı aıtqanda, «Kar-Tel» JShS Erkinqala-2, Aqjar, Aqjar-2, Juldyz-3 shaǵyn aýdandarynda jańa bazalyq stantsııalardyń qosymsha qurylysyn salýdy josparlap otyr.

Eske sala ketelik, buǵan deıin Atyraýda jyl sońyna deıin 72 kóshege dıodty jaryq sham ornatylatynyn habarlaǵan bolatynbyz.