Atyraýdaǵy joldy jóndeýge bıýdjetten 9,7 mlrd teńge bólindi
Atyraý qalalyq turǵyn úı-kommýnaldyq sharýashylyǵy jáne avtokólik joldary bóliminiń basshysy Álibek Muhanbetalıevtiń málimetinshe, shahardaǵy joldyń jaqsy jáne qanaǵattanarlyq jaǵdaıyn 90%-ǵa jetkizý josparlanyp otyr.
«Bıyl joldy qaıta jańǵyrtý men salý úshin respýblıkalyq, jergilikti bıýdjetten 9,7 mlrd teńge bólindi. Qaladaǵy S.Datov, Azattyq kósheleriniń, Atyraý-Inder, Atyraý-Damby, Atyraý-Astrahan baǵytyna shyǵatyn joldyń shahar aýmaǵyndaǵy bóligi qaıta jańǵyrtylady. Bul úshin 4,2 mlrd teńge qarajat qarastyrylǵan. Al, Erkinqala, Erkinqala-2, Rakýsh, Almaly, Tomarly aýyldary men «Balaýsa» shaǵyn aýdanynda, sondaı-aq, Beıbarys dańǵylynan «Atyraý-Astrahan» avtokólik jolyna deıingi aralyǵyna jol salynady. Oǵan 4,6 mlrd teńge bólinip otyr. Jaıaý júrginshilerge arnalǵan joldy salý úshin 892 mln teńge jumsalady. Shahar mańyndaǵy Atyraý, Damby, Aqsaı, Qaıyrshaqty, Erkinqala aýyldarynda, Atyraý qalasynda, Geolog, Jumysker eldi mekenderi jaıaý júrginshi joly salynady», - dedi Álibek Muhanbetalıev.
Onyń aıtýynsha, M.Áýezov kóshesi men Zaroslyı eldi mekenindegi jobalarǵa túzetýler engizilip jatyr. Al, «Atyraý-Erkinqala» avtokólik joly, Ábilhaıyr han dańǵylynan Jastar kóshesine deıingi jol aralyǵyn qaıta jańǵyrtýdan ótedi. Ábilhaıyr han men Beıbarys dańǵyldaryn qosatyn avtokólik jolynyń jobasy ashyq elektrondy konkýrsqa berilgen.
Eske sala ketelik, buǵan deıin Atyraý oblysynda bıyl 25 mektep jańartylatynyn habarlaǵan bolatynbyz.