Atyraýdaǵy jármeńkede 1 myńnan astam bos jumys orny usynyldy

ATYRAÝ. QazAqparat – Atyraýda Respýblıka kúni qarsańynda bos jumys oryndarynyń jármeńkesi ótti. Oǵan 44 kásiporyn qatysyp, 1 myńnan astam bos jumys oryn usyndy, dep habarlaıdy QazAqparat tilshisi.

Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysynyń orynbasary Erkebulan Ábilqasymovtyń málimetine súıensek, jyl basynan beri osyndaı 36 jármeńke ótken. Jármeńkeden 700-den astam adam turaqty jumys tapqan.

«El egemendigi týraly deklaratsııa qabyldanǵan Respýblıka kúni qarsańyndaǵy jármeńkege 44 kásiporyn qatysty. Kásiporyndar jármeńkege kelgen jumyssyz adamdar úshin 1 myńnan astam bos jumys ornyn usyndy. Onyń ishinde 500-den astamy jumysshy mamandyǵyna bolsa, 400-ge jýyǵy – ınjenerlik pozıtsııadaǵy bos oryndar», -dep habarlady Erkebulan Ábilqasymov.

Onyń aıtýyna qaraǵanda, jármeńkege qatysýshylarǵa «2021-2025 jyldarǵa arnalǵan kásipkerlikti damytý» jónindegi Ulttyq joba sheńberinde kórsetiletin áleýmettik qoldaý sharalary týraly aqparat berilgen. Basqarma basshylar jármeńke qorytyndysymen turaqty jumysqa qabyldanǵandar máselesin baqylaýda ustaýdy kózdep otyr.

Eske sala ketelik, buǵan deıin Atyraý turǵyndary 25 qazanda qoǵamdyq kólikte tegin júretinin habarlaǵan edik.