Atyraýdaǵy ýnıversıtet ujymy «Qazaqstan halqyna» qoryna bir kúndik jalaqysyn aýdardy
Memleket basshysynyń tapsyrmasymen «Qazaqstan halqyna» qoǵamdyq áleýmettik qory quryldy. S.Ótebaev atyndaǵy Atyraý munaı jáne gaz ýnıversıtetiniń ujymy atalǵan qorǵa bir kúndik jalaqylaryn aýdarýǵa sheshim qabyldady.
«Qorǵa aýdarylǵan qarjy azamattardyń densaýlyq, bilim, áleýmettik qoldaý, mádenıet jáne sport salalaryndaǵy máselelerin sheshýge baǵyttalady. Sonymen qatar, zardap shekken adamdarǵa kómek kórsetiledi. Al, qınalǵan janǵa kómek berý – barshamyzdyń áleýmettik jaýapkershiligimiz. «Kúshimiz – birlikte» deıtin bolsaq, osyndaı naqty sharalar arqyly bir-birimizge kómektese alamyz. Prezıdent tapsyrmasymen qurylǵan qor áleýmettik qoldaý baǵytyndaǵy problemalardy sheshýge, qoǵamdy biriktirýge yqpal etedi degen senimdemiz», -deıdi ýnıversıtettiń rektory Gúlzada Shakýlıkova.
Eske sala ketelik, budan buryn Atyraý temirjolshylary zardap shekkender úshin qan tapsyryp jatqanyn habarlaǵan bolatynbyz.