Atyraýdaǵy ýchaskede saılaýshylarǵa shubat pen baýyrsaq usynylýda

ATYRAÝ. QazAqparat – Atyraý qalasyndaǵy saılaý ýchaskesiinde saılaýshyǵa shubat pen baýyrsaq usynady, dep habarlaıdy QazAqparat.

Atyraý qalasyndaǵy №7 saılaý ýchaskesi «Senim» elıtarlyq mektep-balabaqshasynda ornalasqan. Ýchaskelik komıssııa tóraǵasy Aınagúl Ahmetovanyń málimetinshe, munda 2 691 saılaýshy tirkelgen.

«Bizdiń saılaý ýchaskesinde tirkelgen eń qart saılaýshy Nadımýlla Ǵabdýrınniń jasy – 92-de. Jasynyń egdeligine baılanysty bul saılaýshynyń daýys berýi úshin saılaý jáshigi úıine jiberildi. Al, tańǵy saǵat 7.00-de 62 jastaǵy Kenjebaı Dúısenǵalıev alǵashqy bolyp tańdaýyn jasady. Oǵan arnaıy syılyq berildi. Sondaı-aq, mundaı múmkindikke 18 jasqa tolyp, eń alǵash daýys berýshiler de ıe boldy, - deıdi Aınagúl Maqsotqyzy.

Atalǵan saılaý ýchaskesinde 9 baıqaýshy daýys berý barysyn baqylap otyr. Onyń biri –halyqaralyq baıqaýshy. Ýchaskede sanıtarlyq talaptar saqtalǵan.

Bir ereksheligi, daýys berýge kelgen saılaýshylarǵa shubat pen baýyrsaq usynady.