Atyraýdaǵy Naryn kanalynda balyq qyryldy
Atyraý oblystyq balyq sharýashylyǵy basqarmasynyń basshysy Artýr Sádibekulynyń aıtýynsha, Naryn kanaly Isataı aýdanynda ornalasqan.
«Búgin Isataı aýdanynyń aýmaǵyndaǵy Naryn kanalynda balyqtyń qyrylý deregi anyqtaldy. Osyǵan baılanysty arnaıy komıssııa quryldy. Komıssıa músheleri bekitilgen balyq qyrylǵan aýmaqqa baryp, tıisti algorıtmge sáıkes máseleniń mán-jaıyn zerdeleýdi bastady. Komıssııa quramynda Atyraý oblystyq balyq sharýashylyǵy basqarmasynyń, Jaıyq-Kaspıı oblysaralyq balyq sharýashylyǵy ınspektsııasy men ekologııa departamentiniń ókilderi bar», -dep habarlady Artýr Sádibekuly.
Basqarma basshysynyń aıtýyna qaraǵanda, qazir Naryn kanalyndaǵy sý men ólgen balyqtan synama alynyp jatyr. Synamalar arnaıy saraptamaǵa jiberiledi. Al, ólgen balyqtar jınalyp, sanıtarlyq talaptarǵa sáıkes joıylady.
«Balyq qyrylý sebebi anyqtalyp jatyr. Al, qyrylǵan balyqtyń mólsheri, tabıǵatqa keltirilgen shyǵyn kólemi saraptama qorytyndysy shyqqan soń qosymsha habarlanatyn bolady», -dep málim etti Artýr Sádibekuly.
Eske sala ketelik, buǵan deıin Atyraý oblysynda balyqtyń qyrylý qaýpi joǵary ekenin habarlaǵan bolatynbyz.
«Qazir sý aıdyndarynda balyq qyrylýy múmkin qaýipti aımaqtardyń tizimi jasaqtalyp, baqylaý jumystary kúsheıtildi. Ár toqsan saıyn atqarylǵan jumystarǵa taldaý júrgiziledi. Orman qorynyń aýmaǵyndaǵy sý aıdyndarynda balyqtyń qyrylý qaýpi óte joǵary deńgeıde saqtalyp otyr. Óıtkeni, orman qoryndaǵy sý kózderi qýraǵan aǵashtar men ósimdikterden tazalanbaǵan. Bul shabaqtyń erkin qozǵalysyna kedergi keltirip, qyrylýyna ákep soqtyrýy múmkin», -degen edi Artýr Sádibekuly.