Atyraýdaǵy munaı óńdeý mekemelerinen 20 tonnaǵa jýyq prekýrsor tárkilendi
Oblystyq polıtsııa departamentiniń baspasóz qyzmetinen málim etkendeı, «Dármek» jedel-profılaktıkalyq is-sharasy kezinde munaı óńdeý mekemeleriniń zerthanalary tekserilgen.
«Atalǵan is-sharany ótkizýdegi maqsat – esirtki quraldarynyń, psıhotroptyq zattar men prekýrsorlardyń zańdy aınalymy salasyndaǵy quqyq buzýshylyqtardy anyqtaý, baqylaýdaǵy zattardyń zańsyz saýdasynyń jolyn kesý. Esirtki qylmysyna qarsy is-qımyl basqarmasynyń qyzmetkeleri Atyraý qalasyndaǵy iri munaı óńdeý mekemeleriniń laboratorııalaryna tekserý jumystaryn júrgizdi.
Tekserý nátıjesinde QR Ákimshilik quqyq buzýshylyq týraly kodeksiniń talabyn buzǵan birneshe derek anyqtaldy. Máselen, 464-baby (Qazaqstan Respýblıkasynyń zańnamasynda belgilengen lıtsenzııalaý normalaryn buzý, onyń ishinde lıtsenzııalanatyn qyzmet túrlerine qoıylatyn biliktilik talaptaryna sáıkes kelmeý) 2 márte, 426-baby (Farmatsevtıkalyq qyzmettiń jáne dárilik zattar men medıtsınalyq buıymdardyń aınalysy salasynyń qaǵıdalaryn buzý) 1 jáne 427-baby (Esirtki, psıhotroptyq zattar, prekýrsorlar aınalymy salasyndaǵy obektiler men úı-jaılardyń tehnıkalyq nyǵaıtylý talaptaryn buzý) 2 ret buzylǵan. Sondaı-aq Atyraý qalasyndaǵy iri munaı óńdeý mekemelerinen 20 tonnaǵa jýyq prekýrsor tárkilendi. Osyǵan baılanysty qujattar jınaqtalyp, saraptama taǵaıyndaldy», - dep habarlady departamenttiń baspasóz qyzmeti.
Eske sala ketelik, budan buryn Abaı oblysynyń turǵyny Atyraýda 1,5 myń doza esirtkini zańsyz saqtaǵanyn habarlaǵan bolatynbyz.
Kúdikti – Abaı oblysynyń 1998 jylǵy turǵyny. Odan salmaǵy 487,75 gramdyq 1 500 doza esirtki zaty tárkilendi. Medıtsınalyq saraptama qorytyndysymen esirtkiniń mefedron ekeni anyqtalyp otyr.