Atyraýdaǵy Mııaly qorǵanynan 560 jádiger tabyldy

ATYRAÝ. QazAqparat – Atyraý oblysynyń Qyzylqoǵa aýdanyndaǵy Mııaly qorǵanynda júrgizilgen qazba jumystary kezinde 560 jádiger tabyldy, dep habarlaıdy QazAqparat.

Oblystyq tarıhı-ólketaný mýzeıiniń dırektory Rashıda Harıpovanyń aıtýynsha, arnaıy qurylǵan arheologııalyq top úsh qorǵanda qazba jumysyn eki aı boıy júrgizgen.

«Bul qorǵandar bizdiń zamanymyzǵa deıingi ІІ ǵasyr men bizdiń zamanymyzdyń HІ ǵasyry aralyǵyn qamtıdy. Bul qorǵandardy 2017 jyly oblystyq tarıhı-ólketaný mýzeıi anyqtaǵan edi. Qorǵannyń joǵarǵy qabaty H-HІ ǵasyrlardan, tómengi qabaty bizdiń zamanymyzǵa deıingi ІІ ǵasyrdaǵy temir dáýirinen syr shertedi», - dedi mýzeı dırektory Rashıda Harıpova.

Onyń aıtýynsha, úsh qorǵanda júrgizilgen qazba jumystary kezinde 560 túrli jádiger tabylǵan. Onyń ishinde altyn men kúmisten soǵylǵan áshekeı buıymdar men at ábzelderi, qoladan soǵylǵan qarý-jaraqtyń, keramıkalyq qumyralar men qaıshy da bar. Qabirdegi adam qańqasynyń jambasynda qadalyp turǵan jebe synyǵy bolǵan.

«Bul adamnyń soǵysta qaza tapqanynyń belgisi bolýy múmkin. Ony ǵun nemese oǵyz taıpasynyń ókili dep topshylap otyrmyz. Sebebi, qorǵannan tabylǵan mola sol kúıi saqtalǵan», - deıdi Rashıda Harıpova.

Endi oblystyq tarıhı-ólketaný mýzeıiniń qyzmetkerleri Qurmanǵazy aýdanynda kezekti arheologııalyq qazba jumysyn júrgizýdi josparlap otyr.

Eske sala ketelik, budan buryn Atyraýda sarmattar dáýirindegi altyn áıel beınesiniń eskızi usynylǵan edi.