Atyraýdaǵy Mahambet aýdanynda Elbasy kúnine oraı jańa kópir ashyldy

ATYRAÝ. QazAqparat - Atyraý oblysyndaǵy Mahambet aýdanynda Tuńǵysh Prezıdent kúnine oraı  jańa kópir ashyldy. Biregeı temirbetondy tireksiz kópir Qazaqstandaǵy jańa tehnologııamen salynǵan alǵashqy kópir, dep habarlaıdy QazAqparat.

Óńirlik kommýnıkatsııalar qyzmetiniń habarlaýynsha, jańa kópirdiń uzyndyǵy - 860 metr, eni-13 metr bolatyn kópir qurylysy 2014 jyly Atyraý oblystyq jolaýshylar tasymaly jáne avtokólik joldary basqarmasynyń tapsyrysymen bastalǵan. Kópir 180 tonna júkti kótere alady, kirme joldarynyń jalpy úzyndyǵy - 8,5 shaqyrym.

Jaıyq ózeni arqyly ótetin avtokólik kópiri tranzıttik tasymaldaýdy damytý baǵdarlamasy aıasynda júzege asqan oblystaǵy 7-shi kópir. Sonymen qatar, jańa kópir «Atyraý-Aqtóbe-Astrahan» jáne «Atyraý-Oral» baǵyttary boıynsha qozǵalysty jáne júk tasymalyn jeńildetedi.

Aýdan turǵyndary asyǵa kútken saltanatty lenta qııý rásimi QR Parlamenti Májilisiniń depýtaty, «Ardagerler keńesi» Respýblıkalyq qoǵamdyq birlestiginiń tóraǵasy Baqtyǵoja Іzmuhambetov pen Násipqalı Samenovke tabystaldy. Sharaǵa arnaıy qatysqan oblys ákimi Nurlan Noǵaev oblys úshin mańyzy bar nysannyń el ıgiligi úshin salynǵanyn atap ótti.

«Búgin barlyq atyraýlyqtar men kórshi oblystar kópten kútken Jaıyqtyń qos jaǵasyn jalǵastyratyn kópir iske qosyldy. Elimizde osyndaı úlken nysandar salýǵa qarjylyq, ákimshilik jaǵdaılar jasalǵan. Osy ıgi ister elimizdegi saıası turaqtylyq, qoǵamdyq kelisim men etnos, dinaralyq tatýlyqtyń arqasynda bolyp jatyr. Bul - Elbasymyz N.Nazarbaevtyń damýǵa, jasampazdyqqa, qazaqstandyqtardyń ál-aýqatyn kóterýge jáne álemdegi qaýymdastyqta Qazaqstannyń óz ornyn alýyna baǵyttalǵan ishki jáne syrtqy saıasattaǵy sarabdal isteriniń nátıjesi. El damýy turaqty qamtamasyz etildi. Jańa tehnologııa men jańa tehnıkalar kelip, halyqtyń ıgiligi úshin qysqa ýaqytta sapaly nysandar salý máselesi sheshilýde. Osy kópir qurylysyn salýǵa atsalysqan barlyq azamattarǵa, sonyń ishinde merdiger «AtyraýInjstroı» mekemesine zor alǵysymdy bildiremin. Jańa nysan el ıgiligine, oblys qajettiligine jarasyn»,-dedi aımaq basshysy Nurlan Asqaruly.

Kópir ózen jaǵalaýlaryn ǵana emes, sonymen qatar ózenniń eki jaǵynda ornalasqan 10 selolyq okrýgti biriktirdi, bul shamamen 40 myń adamdy quraıdy. Turǵyndar buryn ózenniń kelesi jaǵalaýyna parom arqyly ǵana nemese aınalma jol arqyly jetetin, ózende muz qatqan kezde qaýipti bolsa da muz ústimen júrip ótýge týra keldi. Aýdandyq aýrýhanaǵa qabyldaýǵa barý úshin de 100 shaqyrym jerde ornalasqan oblys ortalyǵy arqyly ǵana barý múmkin boldy.