Atyraýdaǵy qamys órtin sóndirýge teńiz jaǵalaýyndaǵy batpaq kedergi bolyp tur - TJD

ATYRAÝ. QazAqparat – Atyraý qalasynan 30 shaqyrym qashyqtyqta, teńiz jaǵalaýynda 14 qyrkúıekten beri qamys janyp jatyr. Jaǵalaýdaǵy batpaqqa baılanysty órtti sóndirý múmkin bolmaı tur, dep habarlaıdy QazAqparat tilshisi.

Oblystyq tótenshe jaǵdaılar departamenti qoǵammen baılanys tobynyń aqparatyna qaraǵanda, órttiń aýmaǵy – shamamen 6 gektar.

Atyraý qalasyna qaraıtyn Keńózek aýyldyq okrýginen 15 shaqyrym kashyqtyqta 14 qyrkúıek kúni saǵat 20:40-ta bastalǵan qamys órti áli byqsyp jatyr. Sol kúni órtti sóndirýge departamenttiń 8 qyzmetkeri men 2 tehnıkasy, «Aqjaıyq» memlekettik tabıǵı rezervatynan 3 qyzmetker, 1 tehnıka, Keńózek okrýginde tirkelgen sharýa qojalyǵynan 3 qyzmetker men 3 traktor tartylǵan.

«Alaıda, 15 qyrkúıek kúni Keńózek aýyldyq okrýgindegi Alǵabas kentinen Kaspıı teńizine qaraı 30 shaqyrym jerge deıin qamystyń byqsýy bastaldy. Qamys órtiniń jalpy aýmaǵy – 6 gektar. Teńiz jaǵalaýyna baratyn joldyń batpaqty bolýyna baılanysty órtti sóndirý múmkin emes», - dep habarlady departamenttiń qoǵammen baılanys toby.

Keshe, 15 qyrkúıekte Atyraý oblystyq tótenshe jaǵdaılar departamentiniń 2 qyzmetkeri 1 TREKOL tehnıkasymen, «Aqjaıyq» memlekettik tabıǵı rezervatynyń 30 qyzmetkeri 10 tehnıkamen qamys órtin baqylaýǵa alǵan. Al, búgin 16 qyrkúıekte «Aqjaıyq» memlekettik tabıǵı rezervatynyń qyzmetkerleri qamys órtin qaraýyldaý jumystaryn jalǵastyrdy.

Qamys órti Atyraý oblystyq tótenshe jaǵdaılar departamentiniń turaqty baqylaýyna alynǵan. Órtten eldi mekenderge qaýip tónip turǵan joq.

Eske sala ketelik, buǵan deıinAtyraý qalasynan 30 shaqyrym jerde 6 gektar qamys janyp jatqanyn habarlaǵan edik.