Atyraýdaǵy dárigerler dınastııasy sabaqtastyqty úshinshi býynǵa jalǵap otyr

ATYRAÝ. QazAqparat – Atyraýlyq Basarolla Haresovtiń otbasyn dárigerler dınastııasy deýge bolady. Úsh býynǵa jalǵasqan dárigerlik kásipti eki ýrolog, ftızıator, okýlıst, nevropatolog, stomatolog, jalpy tájirıbe dárigeri jalǵastyryp keledi, dep habarlaıdy QazAqparat tilshisi.

Basarolla Haresovtiń mamandyǵy – ýrolog. Aqtóbe medıtsına ınstıtýtyn 1969 jyly bitirgen. Eńbek jolyn Atyraý oblystyq aýrýhanasynda bastaǵan. Osy aýrýhanada dárigerlik tájirıbesi shyńdalyp, 1972-1973 jyldary bas dərigerdiń emdeý isi jónindegi orynbasary bolǵan. Odan soń oblystyq qan quıý stansasyn basqardy. Al, 1986-1993 jyldary oblystyq aýrýhanaǵa qaıta oralyp, bas dərigerdiń emdeý isi jónindegi orynbasary, 1993-2006 jyldary ýrologııa bóliminiń meńgerýshisi laýazymyn atqarǵan. Keıin ýrolog-ordınator retinde naýqastardy emdep, jas býyndy osy mamandyqtyń qyr-syryna úıretti. Uzaq jylǵy jemisti eńbegi úshin KSRO Densaýlyq saqtaý isiniń úzdigi atanǵan.

Onyń ómirlik jary Bazargúl Myrzaǵalıevanyń mamandyǵy – ftızıatr. Ókpesine daq túsken jandardy emdeýge atsalysyp, mamandyǵyna adaldyǵynan aınyǵan joq.

«Biz balalarymyzdyń jolymyzdy jalǵastyrǵanyn qaladyq. Óıtkeni, aq halat kıgen dárigerdiń jany appaq, júregi taza bolady. Adamzat úshin eń qadirli mamandyq – dáriger. Sondyqtan, balalarymyzǵa bul mamandyqtyń mańyzyn uǵyndyra aldyq dep oılaımyn. Sonyń nátıjesindeı, tórt balamyzdyń ekeýi dáriger mamandyǵyn tańdady. Bizdiń dárigerlik kásibimiz úshinshi býynǵa jalǵasty. Qazir áýletimizde jeti dáriger bar», - deıdi ardager.

Áke-sheshesiniń dárigerlik jolyn jalǵastyrǵan Álibek Basarollauly 8-synyptan soń Atyraý medıtsıalyq ýchılışesinde oqyǵan. Jazǵy demalysta jedel járdem stansasynda sanıtar boldy.

Al, qyzy Venera okýlıst bolýdy maqsat etken. Adamnyń kóz janaryn saqtaýǵa úles qosý úshin joǵary bilim alǵan. Qazir joǵary sanatty dáriger oblystyq oftalmologııa aýrýhanasyndaǵy bilikti mamannyń birine aınaldy.

«Joǵary bilim alý úshin M. Ospanov atyndaǵy Batys Qazaqstan medıtsınalyq akademııasyna oqýǵa tústim. Mamandyǵym – ýrolog. Qazir ákemniń jolyn jalǵastyryp, oblystyq aýrýhanada jumys isteımin», - deıdi Álibek Basarollauly.

Osy áýlettiń kelini Gúlsim Qazmaǵambetova da dáriger mamandyǵyn tańdaǵan. Ol da Aqtóbedegi medıtsınalyq akademııany bitirgen. Qazir oblystyq balalar aýrýhanasynda nevropatolog bolyp jumys istep júr. Álibek Basarollauly ekeýi alty bala tárbıelep otyr.

Dárgigerler dınastııasynyń úshinshi býynyn Baljan Əlibekqyzy men Nurjan Nurlanuly jalǵastyryp keledi. Baljan stomatologııa salasyn meńgergen. Al, Nurjan – jalpy təjirıbe dərigeri.

Eske sala ketelik, buǵan deıin Atyraý oblysynda 14 medıtsınalyq emdeý nysany salynatynyn https://kaz.inform.kz/news/atyrau-oblysynda-14-medicinalyk-emdeu-nysany-salynady_a3943317 jazǵan bolatynbyz.