Atyraýdaǵy «Aqjaıyq» tabıǵı rezervatynda taǵy da qamys órti tutandy
Atyraý oblystyq tótenshe jaǵdaılar departamentiniń qoǵammen baılanys tobynyń málimetinshe, ǵaryshtyq monıtorıng arqyly qamystyń byqsý oshaǵy anyqtalǵan.
«Kaspıı teńiziniń jaǵalaýyndaǵy «Aqjaıyq» memlekettik tabıǵı rezervat aýmaǵynda qamys órti tutanǵan. Qazir byqsyǵan qamysty sóndirý úshin «Aqjaıyq» memlekettik tabıǵı rezervatynyń qyzmetkerleri jiberildi. Departament tarapynan arnaıy órt sóndirýge attanatyn top quryldy. Órt oshaǵy ulǵaıǵan jaǵdaıda sý shashatyn qurylǵysy MI-8 tikushaǵy ázir tur», - dep habarlady departamenttiń qoǵammen baılanys toby.
Eske sala ketelik, buǵan deıin Kaspıı jaǵalaýynda 7 kúnge sozylǵan qamys órti sóndirilgenin habarlaǵan edik.
Kaspıı teńiziniń jaǵalaýyndaǵy qamys órti 6 shildede anyqtalǵan. Atyraý oblystyq tótenshe jaǵdaılar departamenti basshysynyń mindetin atqarýshy Asqat Erjanovtyń málimetinshe, qamys órti Atyraý qalasyndaǵy Keńózek aýyldyq okrýginen 30 shaqyrym qashyqtyqta tirkelgen.
«Qamys órtin sóndirý úshin Atyraý oblystyq tótenshe jaǵdaılar departamenti men «Aqjaıyq» memlekettik tabıǵı rezervatynan 80 adam men 14 tehnıka, «Qazavıaqutqarý» AQ-nyń MI-8 tikushaǵy jumyldyryldy. Órt bastalǵannan beri tikushaqpen 167 ret 500 tonnadan astam sý tógildi», - dep habarlady departamenttiń qoǵammen baılanys tobynan.
Oblys ákimi baspasóz qyzmetiniń málimetinshe, bıyl «Aqjaıyq» memlekettik tabıǵı rezervatyna arnaıy tehnıka satyp alýǵa respýblıkalyq bıýdjetten 285 mln teńge bólingen. Al Atyraý oblysynyń tótenshe jaǵdaılar departamentine 30 tehnıka satyp alýǵa jergilikti bıýdjetten 1,5 mlrd teńge qarastyrylǵan.