Atyraýdaǵy «Aqjaıyq» rezervatynyń materıaldyq bazasyn jaqsartýǵa 1,5 mlrd teńge bólindi
Atyraý oblysy ákiminiń orynbasary Jasulan Bısembıevtiń aıtýynsha, «Aqjaıyq» memlekettik tabıǵı rezervatyndaǵy órt qaýipsizdigin qamtamasyz etý maqsatynda keshendi sharalar qolǵa alynǵan.
«Oblys ákimi Serik Shápkenovtiń tapsyrmasymen «Aqjaıyq» memlekettik tabıǵı qoryǵyndaǵy qaýipsizdikti qamtamasyz etý, órt sóndirý qyzmetiniń materıaldyq-tehnıkalyq bazasyn jaqsartý úshin jergilikti bıýdjetten 1,5 mlrd teńge bólindi. Bul qarajatqa jol talǵamaıtyn 2 kólik, jedel áreket etýge arnalǵan 2 kólik, 1 avtosaty satylyp alynady. Budan basqa da qaýipsizdik maqsatyndaǵy tehnıkalardy satyp alý josparlanyp otyr. Al orman sharýashylyǵy salasyndaǵy mekemelerdiń shtatyna qosymsha 38 birlik bólindi», - dep habarlady Jasulan Bısembıev.
Onyń aıtýyna qaraǵanda, Atyraý oblysynyń ákimdigi «Aqjaıyq» memlekettik tabıǵı rezervatyn kommýnaldyq balansqa alý máselesin kótergen.
«Alaıda Ekologııa jáne tabıǵı resýrstar mınıstrligi rezervatty ákimdik balansyna berý erekshe qorǵalatyn aýmaqtar týraly zańǵa qaıshy keletinin bildirdi. Degenmen mınıstrlik qoryqtyń materıaldyq-tehnıkalyq bazasyn jaqsartýǵa 285 mln teńge bóldi. Qazir rezervat aýmaǵynda tutanatyn órttiń aldyn alý maqsatynda ǵaryshtyq monıtorıng júıesi qoldanyla bastady. Máselen, 28 shilde kúni bul júıe alǵashqy nátıjesin berip, qamys órti tutanǵan boıda óshirildi», - dep málim etti Jasulan Bısembıev.
Eske sala ketelik, buǵan deıin Atyraýdaǵy «Aqjaıyq» tabıǵı rezervatynda taǵy da qamys órti tutanǵanyn jazǵan bolatynbyz.