Atyraýda jylý-elektr ortalyǵynyń mańynda órt shyqty

ATYRAÝ. QazAqparat – Atyraýda jylý-elektr ortalyǵynyń aýmaǵyndaǵy ıesiz nysannyń shatyry órtendi, dep habarlaıdy QazAqparat tilshisi.

Áleýmettik jelide taraǵan órt týraly derekti Atyraý oblystyq tótenshe jaǵdaılar departamentiniń qoǵammen baılanys toby rastady.

«Bgin, 7 tamyzda jergilikti ýaqytpen saǵat 14:00-de Atyraý qalasynda ornalasqan Ońtústik óndiristik aımaq mekenjaıyndaǵy aýladan tútin shyqqany jóninde habar tústi. Tótenshe jaǵdaılar departamentiniń qyzmetkerleri oqıǵa ornyna jedel attandy. Órtti sóndirýge 6 qyzmetker men 1 tehnıka tartyldy. Órt saǵat 15:03-te oqshaýlandy», -dep habarlady departamenttiń qoǵammen baılanys toby.

Belgili bolǵandaı, 31 shilde men 6 tamyz aralyǵynda Atyraý oblystyq tótenshe jaǵdaılar departamentiniń qyzmetkerlerine 58 ret shaqyrtý túsken. Soǵan baılanysty qutqarýshylar tótenshe jaǵdaıdy joıýǵa jáne adamdardy qutqarýǵa shyqqan.

«Qutqarýshylar bir aptada 6 ret jalyndy sóndirýge, 34 ret órt sanatyna jatpaıtyn janýǵa, 4 márte avarııalyq qutqarý, 8 ret izdestirý jumystaryna bardy. Toǵyz adam, onyń ishinde 3 bala qaýipsiz jerge evakýatsııalandy. Aldyńǵy aptadaǵy derekpen salystyrǵanda, shaqyrtýǵa barý kórsetkishi 87 paıyzǵa óskeni baıqalyp otyr», - dep málim etti departamenttiń qoǵammen baılanys tobynan.

Eske sala ketelik, budan buryn Atyraýdaǵy «Aqjaıyq» tabıǵı rezervatynda taǵy da qamys órti tutanǵanyn jazǵan bolatynbyz.

Kaspıı teńiziniń jaǵalaýyndaǵy «Aqjaıyq» memlekettik tabıǵı rezervatynyń aýmaǵynda qamys órti tutanǵan. Byqsyǵan qamysty sóndirý úshin «Aqjaıyq» memlekettik tabıǵı rezervatynyń qyzmetkerleri jiberilgen bolatyn.