Atyraýda jyl basynan beri 8 adam kómirqyshqyl gazynan ýlanyp qalǵan
Oblystyq tótenshe jaǵdaılar departamentiniń qoǵammen baılanys tobynan málim etkendeı, oqıǵa búgin, 24 qańtarda bolǵan.
«Jergilikti ýaqytpen saǵat 07:30-da Atyraý qalasynyń mańyndaǵy Tomarly aýylyndaǵy jeke turǵyn úıde 3 adamnyń kómirqyshqyl gazynan ýlanyp qalǵany týraly habar tústi. Oqıǵa ornyna jetken qutqarýshylar 1976 jyly týǵan er adam men áıeldiń, 2009 jylǵy jasóspirimniń kómirqyshqyl gazynan zardap shekkenin anyqtady. Jedel járdem brıgadasynyń kóligimen eresek er adam men áıel oblysyq aýrýhanaǵa, al, jasóspirim oblystyq balalar aýrýhanasyna jetkizildi», -dep habarlady departamenttiń qoǵammen baılanys toby.
Munaıly shaharda mundaı oqıǵa jyl basynan beri ekinshi ret qaıtalanyp otyr. Alǵashqy oqıǵa 9 qańtarda Vodnıov-2 eldimekeninde tirkelgen.
Qutqarýshylar bir otbasynnyń 5 adamy, atap aıtqanda, úı ıesi – 1980 jylǵy áıel men onyń 2013, 2014, 2016 jáne 2019 jyly týǵan balalarynyń gazǵa ýlanyp qalǵanyn anyqtaǵan.
Buǵan as bólmesinde ornalasqan gaz plıtasynan shyqqan aqaý sebep bolǵan.
«Atyraý oblysynyń turǵyndary men qonaqtarynan turǵyn úıdegi órt qaýipsizdigi erejelerin qatań saqtaýdy suraımyz. Kúndelikti turmysta qoldanylatyn buıymdar men elektr qurylǵylaryn elektr jelisine qosýly kúıde qaldyrmaǵan jón. Bul sońy ókinishke uryndyratyn oqys oqıǵaǵa sebep bolýy múmkin», -dep málim etti departamenttiń qoǵammen baılanys tobynan.
Eske sala ketelik, buǵan deıin Atyraýda bir otbasynyń 6 adamy gazdan ýlanyp, bireýi kóz jumǵanyn jazǵan edik.