Atyraýda jyl basynan beri 364 mln teńge jalaqy qaryzy óndirildi
Oblystyq memlekettik eńbek ınspektsııasy basqarmasynyń basshysy Igilik Áýbákirovtiń
málimetinshe, jyl basynan beri 1 myńǵa jýyq jumysshynyń quqyǵy qorǵalǵan.
«Bizdiń basqarmaǵa túsetin ótinishterdiń basym bóligi jalaqyny ýaqytynda tólemeý, eńbek shartyn saqtamaý, sondaı-aq, zańsyz jumystan bosatý máselesine qatysty bolyp otyr. Mundaı buzýshylyqtar jumys berýshilerdiń eńbek zańnamasyn elemeýinen, laýazymdy tulǵalardyń nemquraıdylyǵymen baılanysty ekeni daýsyz. Jyl basynan beri jumysshylardyń paıdasyna 364 mln teńge jalaqy qaryzy óndirildi. Al kompanııalar men merdiger uıymdarǵa 9 mln teńgege jýyq aıyppul salyndy» -deıdi Igilik Áýbákirov.
Eske sala ketelik, buǵan deıin Atyraýda 1 myńnan astam jumysshynyń 263,8 mln teńge jalaqy qaryzy ótelgen bolatyn.