Atyraýda jýrnalıst Vıktor Sýtıagınniń kóligin belgisiz bireý órtep jiberdi
«Men kólikti úıdiń buryshyna qaldyryp ketken bolatynmyn. Saǵat 00:00-de syrtqa shyqqanda tynysh edi. Kórshiniń beınebaqylaý kamerasynan kúdikti adamnyń saǵat 02:24-te kelgenin kórýge bolady. Ol kóliktiń kapotyna birdeńe istep jatty. Biraz ýaqyttan soń jarylys boldy. Kúdiktiniń ózi zardap shegýi múmkin. Odan basqa eshkimge zaqym kelgen joq. Jaqyn jerde kórshilerdiń kólikteri turǵan bolatyn. Alaıda olardy alyp úlgerdi»,-dedi jýrnalıst.
Vıktor Sýtıagın «QazAqparat» HAA-nyń Atyraýdaǵy menshikti tilshisi.
«QazAqparat» ujymy qalalyq Polıtsııa departamentinen oqıǵaǵa qatysty jaǵdaıdy túsindirýdi surady.
Polisia.kz saıtynyń habarlaýynsha, 11 mamyr kúni saǵat 04:21 shamasynda Atyraý qalasy polıtsııa basqarmasynyń avtopatrýldik ekıpajy Naýryzalıev kóshesindegi úıdiń janynan órtenip jatqan Lexus RX-300 avtokóligin kórdi.
«Oqıǵa ornyna dereý órt sóndirý qyzmeti jiberildi. Jarylys belgileri joq. Oqıǵa ornynda qajetti jedel-tergeý is-sharalary júrgiziledi. Bolǵan oqıǵanyń sebep-saldarlary anyqtalyp jatyr. Jábirlenýshiniń ótinishi QK-niń 202-baby 3-bóligi boıynsha sotqa deıingi tergeýdiń biryńǵaı tizilimine tirkelgen»,-delingen polıtsııanyń habarlamasynda.