Atyraýda jumyssyzdarǵa arnalǵan jármeńkede 1 myńǵa jýyq bos jumys orny usynyldy
Oblystyq jumyspen qamtýdy úılestirý jáne áleýmettik baǵdarlamalar basqarmasynyń uıymdastyrýymen jumyssyz júrgen azamattar jáne «Teńizshevroıl» JShS-niń keleshek keńeıý jobasynan bosatylǵan qyzmetkerleri úshin bos jumys oryndarynyń jármeńkesi ótti. Jármeńkege 34 kásiporyn qatysyp, 1 myńǵa jýyq bos jumys ornyn usyndy.
Basqarma basshysy Azamat Mámbetovtiń aıtýynsha, usynylǵan bos jumys oryndarynyń tiziminde tehnıkalyq qubyrlardy montajdaý, jóndeý slesari, elektrık, qubyrmontajdaýshy, dánekerleýshi, kólik jóndeý, elektrmontajdaýshy, baqylaý jáne ólsheý aspaptaryn montajdaýshy, júrgizýshi, júk tasýshy, jol jumysshysy, operator, defektoskopıst, ekskavator, býldozer mashınısi, aspaz, aspaz kómekshisi sekildi mamandyqtar bar. Sonymen qatar, ınjenerlik laýazymǵa 387 maman qajet.
«Jumyspen qamtýdyń belsendi sharalarynyń biri – bos jumys oryndarynyń jármeńkesin ótkizý. Jyl basynan beri 3 330 adamnyń jáne 239 jumys berýshilerdiń qatysýymen 26 bos jumys oryndarynyń jármeńkesi ótkizildi. Jármeńkeden soń 592 adam turaqty jumyspen qamtyldy. Jumysqa ornalastyrý sharalary jalǵasa beredi. Jumyssyzdarǵa arnalǵan jármeńkede kelýshilerdiń bárine keńes berilip, jumyspen qamtý salasynda engizilgen ózgerister, áleýmettik qoldaý sharalary tanystyryldy», -deıdi Azamat Mámbetov.
Onyń aıtýyna qaraǵanda, jyl aıaǵyna deıin taǵy da 10 jármeńke ótkizý josparlanǵan. Buǵan qosa, jumyssyz júrgen adamdar bos jumys oryndaryn «Elektrondy eńbek bırjasy» portalynan qarap, elektrondy nusqada túıindemesin jiberýine bolady.
Eske sala ketelik, buǵan deıin Atyraý oblysynda 994 otbasyǵa ataýly áleýmettik kómek taǵaıyndalǵanyn habarlaǵan bolatynbyz.