Atyraýda jumyspen qamtý ortalyǵyna júgingen 28 myń adamnyń 40% ǵana jumysqa ornalasty

ATYRAÝ. QazAqparat – Atyraý oblysynda jumyspen qamtý sharalaryna 30 myńnan astam adam tartyldy, dep habarlaıdy QazAqparat tilshisi.

Oblystyq jumyspen qamtýdy úılestirý jáne áleýmettik baǵdarlamalar basqarmasynyń bólim basshysy Gúlbolat Amanǵalıevanyń málimetine súıensek, jyl basynan beri jumyspen qamtý jobalaryna 30 598 adam jumyspen qamtý sharalaryna tartylǵan.

«Jumyspen qamtý sharalary memlekettik baǵdarlamalar negizinde iske asyrylady. Máselen, jumyspen qamtylǵan adamdardyń arasynda 795 jas bar. Olar «Jastar praktıkasy» jobasy arqyly qabyldanǵan. Al, túrli oqý oryndaryn bitirgen 100 túlek «Alǵashqy jumys orny» baǵdarlamasymen jumysqa ornalasyp otyr. Bıyl iske asyryla bastaǵan «Urpaqtar kelisimsharty» jáne «Kúmis jas» jobasy aıasynda 41 adam jumyspen qamtyldy. Ótken jylmen qosa eseptegende osy kezeńge deıin 30 598 adam jumyspen qamtýǵa qatysty túrli sharalarmen qamtylyp, ýaqytsha jáne turaqty jumys oryndaryna ornalasty», -deıdi Gúlbolat Amanǵalıeva.

Onyń deregine súıensek, bıyl jumyspen qamtý ortalyqtaryna 28 myńnan asa adam júgingen. Qazir onyń 40 paıyzy jumyspen qamtylǵan.

Onyń ishinde 8 myńnan asa adam turaqty jumysqa ornalasqan. Al, ózgeleri túrli baǵdarlamalar aıasynda ýaqytsha, ári áleýmettik jumystarmen qamtylǵan.

Sondaı-aq, jumyssyz júrgen 429 adam ártúrli mamandyqty meńgerý úshin oqý kýrstaryna jiberilgen.

Al, 855 adam «Skills» veb-jobasy arqyly onlaın kýrstan ótken. «Bastaý-bıznes» jobasymen 2 346 adam kásipkerlik týraly bilimin jetildirgen.

Eske sala ketelik, buǵan deıin Atyraýdaǵy jármeńkede 1 myńnan astam bos jumys orny usynylǵanyn jazǵan edik.