Atyraýda jolaýshylardyń 90 paıyzy avtobýsta jolaqyny kartamen tólep júr

ATYRAÝ. QazAqparat – Atyraýda jolaýshylardyń 90 paıyzy qoǵamdyq kóliktiń jol aqysyn kartamen tólep júr, dep habarlaıdy QazAqparat tilshisi.

Atyraý qalalyq ákimdiginiń baspasóz qyzmetinen málim etkendeı, 2018 jyly munaıly shaharda qoǵamdyq kólik jolaqysyn tóleýdiń elektrondyq júıesi engizilgen.

«Smart Atyrau» kommýnaldyq memlekettik kásipornynyń deregine qaraǵanda, sońǵy úsh aıda 227 myńnan astam adam «Smart Qala» kartasyn qoldanǵan.

Bul – qoǵamdyq kólikke mingen jolaýshylardyń 90 paıyzy.

«Jolaqy tóleý úshin «Smart Qala» kartasy engizildi. Bıyl bul kartany qoldanýshylar sany 10 paıyzǵa artyp otyr. Jolaýshylardyń 10 paıyzy ǵana jolaqyny qolma-qol aqshamen tóleıdi. Elektrondy kartasynyń standartty túrinen basqa, mektep oqýshylary men stýdentterge, kópbalaly analarǵa, zeınetkerlerge arnalǵan túrleri bar. Jolaýshylardyń 90 paıyzy osy kartany paıdalanady. Qoǵamdyq kólik jolaqysyn sms jáne QR kodpen de tóleýge bolady», -dep habarlady ákimdik tiń aspasóz qyzmeti.

Ákimdiktiń baspasóz qyzmetiniń málimetinshe, «Smart Qala» kartasymen Atyraýdan ózge, Semeı, Aqsý, Oral, Aqtóbe qalalarynda da jolaqy tóleý múmkindigi qarastyrylǵan.

Eske sala ketelik, budan buryn Qurban aıttyń birinshi kúni atyraýlyqtar qoǵamdyq kólikte tegin júretinin habarlaǵan edik.

Qalalyq ákimdik pen jolaýshy tasymaldaıtyn kásiporyndar ataýly kúnderge oraı qoǵamdyq tegin júrý múmkindigin usynyp keledi.

Qazir Atyraýda jolaýshy tasymaldaýmen aınalysatyn birneshe kásiporyn bar.

Qala men oǵan taıaý mańda ornalasqan eldi mekenderge jolaýshy tasymaldaý úshin kún saıyn 240 avtobýs jolǵa shyǵady.