Atyraýda jol-kólik oqıǵalary saldarynan mert bolǵandar sany 8,8%-ǵa ósken

ATYRAÝ. QazAqparat – Atyraýda jol qaýipsizdigin qadaǵalaıtyn mamandarda jaýapkershilik joq. Oblys ákimi Serik Shápkenov bul týraly quqyq buzýshylyq profılaktıkasy jáne sybaılas jemqorlyqqa qarsy is-qımyl máseleleri jónindegi vedomstvoaralyq komıssııanyń otyrysynda málim etti, dep habarlaıdy QazAqparat tilshisi.

Komıssııa otyrysynda oblys aýmaǵyndaǵy tasjoldarda jol-kólik oqıǵalaryn aldyn alý máselesi qaraldy. Atyraý oblystyq polıtsııa departamentiniń bastyǵy Nurhat Orazbaevtyń aıtýynsha, bıylǵy 5 aıda jol-kólik oqıǵasy 5,4%-ǵa tómendegen. Alaıda mert bolǵandar sany 8,8%-ǵa ósken.

«Jol-kólik oqıǵalarynyń deni júrgizýshilerdiń jyldamdyqty shamadan tys asyrýynan, qarsy baǵytqa shyǵýynan bolady. Respýblıkalyq mańyzy bar tasjoldarda normatıvke sáıkes táýligine 3 500 avtokólik ótýi tıis. Qazir bul kórsetkish 9 myń avtokólikke jetti. Nátıjesinde avtokólikterdiń aǵyny 3 ese artyp, jol apatynyń ósýine áser etip otyr», - dedi Nurhat Orazbaev.

Quqyqtyq statıstıka jáne arnaıy esepke alý jónindegi komıteti Atyraý oblystyq basqarmasynyń bastyǵy Ǵalymjan Qusannyń aıtýynsha, jol-kólik oqıǵalarynyń sebebine únemi taldaý júrgiziledi.

«Jol-kólik oqıǵalarynyń 48 paıyzy Atyraý qalasynda tirkelgen. Onyń 24 paıyzy avtokólikterdiń soqtyǵysýyna, 35 paıyzy jaıaý júrginshilerdi qaǵý deregine baılanysty tirkelip otyr. Jaıaý júrginshiler kóktem jáne kúz mezgilde joldyń kólikke arnalǵan bóligimen júredi. Jol apatynyń 90%-ǵa jýyǵy respýblıkalyq jáne oblysaralyq joldarda tirkeldi. Statıstıkalyq málimetterge sáıkes, bıylǵy jol-kólik oqıǵasynyń 14 paıyzy oń jaq rýldi kóligi bar taksı júrgizýshileriniń kesirinen bolǵan», - dep málim etti Ǵalymjan Qusan.

Oblys ákimi Serik Shápkenovtiń pikirinshe, jol qaýipsizdigine jaýapty sala basshylarynyń jaýapkershiligin kúsheıtý qajet.

«Bekitilgen jol júrý erejesi bar. Tártip bolýy kerek. Qaladaǵy 1600 jaıaý júrginshiler jolyna jaryq ornatyldy. Quny birneshe mlrd teńgeniń «Sergek» qurylǵysy iske qosyldy. Patrýldik kólik te jetkilikti. Jyl saıyn polıtsııa departamentine suraǵan qarajatty bólip, polıtseılerdiń jalaqysyn ósirý úshin qosymsha qarjy berip otyrmyz. Jol qaýipsizdigin qadaǵalaıtyn mamandarda jaýapkershilik joq», -dedi Serik Shápkenov.

Eske sala ketelik, budan buryn Atyraýda jol apatynan bir otbasy músheleri túgeldeı kóz jumǵanyn jazǵan edik.