Atyraýda jol apatynan júrgizýshi oqıǵa ornynda, bir jolaýshy aýrýhanada kóz jumdy

ATYRAÝ. QazAqparat – Atyraý oblysynda jol apatynan júrgizýshi oqıǵa ornynda, bir jolaýshy aýrýhanada kóz jumdy. Taǵy bir júrgizýshi men 3 adam aýrýhanaǵa jetkizildi, dep habarlaıdy QazAqparat.

Oblystyq polıtsııa departamentiniń baspasóz qyzmetinen málim etkendeı, jol-kólik apaty búgin, 15 aqpanda saǵat 15:00 shamasynda bolǵan.

«Búgin «Atyraý-Inder» baǵytyndaǵy tas joldyń 72-shaqyrymynda Toyota Ipsum jáne Lada Granta avtokólikteri soqtyǵysqan. Jol-kólik apatynyń saldarynan Lada Granta avtokóliginiń 1997 jylǵy júrgizýshisi oqıǵa ornynda kóz jumdy. Al, 1962 jylǵy jolaýshy aýrýhanada qaıtys tapty. Túrli dene jaraqatyn alyp, zardap shekken Toyota Ipsum kóliginiń júrgizýshisi men 3 jolaýshy Mahambet aýdandyq ortalyq aýrýhanasyna jetkizildi», -dep habarlady departamenttiń baspasóz qyzmeti.

Jol apatynan keıin Toyota Ipsum kóligi órtenip ketti.

Qazir atalǵan jol-kólik oqıǵasyna baılanysty QR Qylmystyq kodeksiniń 345-baby 4-bóligimen sotqa deıingi tergeý bastaldy.

Tergeýdi Mahambet aýdandyq polıtsııa bólimi qyzmetkerleri júrgizip jatyr.

Eske sala ketelik, budan buryn Atyraý oblysynda jol apatynan bir adam mert bolyp, ekeýi aýrýhanaǵa túskenin habarlaǵan bolatynbyz.

Polıtsııa departamentiniń aqparatyna qaraǵanda, 21 qańtarda bolǵan eki jol apatynan 6 adam túrli dene jaraqatymen aýrýhanaǵa jatqyzylǵan.

Al, 28 qańtarda tirkelgen jol apatynan bir adam kóz jumyp, ekeýi aýrýhanaǵa túsken.

Foto: Polıtsııa departamenti