«Atyraýda jetimder úıi jabylyp jatyr» - baspasózge sholý

ASTANA. 28 qyrkúıek. QazAqparat - «QazAqparat» agenttigi respýblıkalyq basylymdarda 28 qyrkúıek, senbi kúni shyqqan ózekti materıaldarǵa sholýdy usynady.

*** «Keshe Monako Knıazdigine resmı saparmen kelgen Elbasy Nursultan Nazarbaevty Knıazdik saraıynyń aldyndaǵy alańda resmı qarsy alý rásimi boldy. Knıazdiktiń osyndaı sharalarǵa arnalǵan úlken orkestri Qazaqstan Prezıdentine qurmet kórsetti», - dep jazady «Egemen Qazaqstan» gazeti senbilik sanyndaǵy «Sharýasy sharyqtaǵan shaǵyn el» degen taqyryptaǵy maqalasynda. Qarsy alý rásimi aıaqtalǵan soń Prezıdent Nursultan Nazarbaev Monako Knıazi Alber ІІ-men ońasha kezdesip, ekijaqty kelissóz júrgizdi. Odan keıin eki eldiń basshylary memlekettik nagradalarmen almasty. Qazaqstan Prezıdenti Nursultan Nazarbaev eki eldiń yntymaqtastyǵyn damytýǵa sińirgen eńbegi úshin Áýlıe Karldyń Krest ordenimen marapattaldy. Bul orden - Monakonyń eń joǵary memlekettik nagradasy. Al Monako Knıazi Alber ІІ-ge І dárejeli «Dostyq» ordeni tapsyryldy. Qazaqstan Prezıdenti resmı sapar sheńberinde Knıazdiktiń ýrbanıstıkalyq jáne qarjylyq damýynyń tusaýkeserine qatysty. Tusaýkeser barysynda Memlekettik mınıstr M.Roje, ekonomıkalyq damý jáne qarjy mınıstri J.Kastellını, áleýmettik máseleler jáne densaýlyq saqtaý jónindegi mınıstr S.Valerı, qorshaǵan ortany qorǵaý jáne qala qurylysy mınıstri M.P.Gramalııa Memleket basshysyna tıisti salalardyń jaǵdaıy men damý perspektıvasy týraly, atap aıtqanda, Greıs Knıagınıa emhanasy qurylysynyń jospary, shekteýli alańǵa ıe Knıazdiktegi qala qurylysyn júrgizýdiń odan arǵy baǵyttary týraly aqparattar berdi. Qazaqstan Prezıdenti tusaý­keserdiń qanaǵattanarlyq maz­munyn atap kórsetip, osy saparǵa shaqyrǵany úshin taǵy da alǵysyn bildirdi. «Qazaqstan-2050» Strategııasy - qalyptasqan memlekettiń jańa saıası baǵyty» atty Memleket basshysy N.Á.Nazarbaevtyń Qazaqstan halqyna Joldaýy elimizdiń jańa kezeńge aıaq basqandyǵyn kórsetken qujat boldy. Endi ony áli de bolsa halyq arasynda keńinen nasıhattap, túsindirýdiń mańyzy joǵary. Osy rette «Egemen Qazaqstan» gazeti Parlament Senatynyń depýtaty Erbolat Muqaevtan Joldaýdyń mańyzyn asha otyryp, elimizge qatysty ózge de suraqtarǵa jaýap berýin ótingen. Basylymnyń tilshisiniń barlyq saýalyna tuşymdy jaýap qaıyrǵan senator: «Keden odaǵy men Birtutas eko­nomıkalyq keńistik o bas­ta Elbasynyń bastamasymen jú­zege asqany barshaǵa málim. El­basynyń «Bizder óz-ózimizdi tolyq qamtamasyz etý úshin halqymyzdyń sany 25 mıllıondaı bolýy kerek», degeni bar-dy. Halyqtyń sany neǵurlym kóp bolsa, óndirilgen ónim soǵurlym ótimdi. Básekege qabiletti bolýymyz úshin ishki suranysty arttyrý da halyq sanymen tyǵyz baılanysty. Olaı bolsa, Qazaqstan, Reseı jáne Belarýs bolyp birigip, álemdik básekede óz ornymyzdy tabýǵa talpynýymyz óte oryndy», - deıdi. Suhbat «Maqsat - áleýmettiń áleýetin arttyrý» degen taqyryppen berilgen. *** AQSh-taǵy qazaqstandyq qos jetimniń taǵdyry búkil álemniń nazaryn aýdartyp, shýlatyp jatqanda Atyraýdan kóńil qýantarlyq habar tarady. Sońǵy 1,5 jyldyń ishinde balalar úıinen sábı asyrap alýshylardyń qatary keıingi 10 jyldaǵy kólemnen de asyp túsken. Igilikti istiń nátıjesinde oblystaǵy jetimder úıiniń biri jabylypty. Endi ekinshi jetimhananyń da esigine qara qulyp salynatyn kún taıaý. «Aıqyn» gazetiniń jazýynsha, mundaı jańalyqty keshe Astanada Prezıdent janyndaǵy Ortalyq kommýnıkatsııalar qyzmetinde brıfıng ótkizgen Atyraý oblysynyń ákimi Baqtyqoja Іzmuhambetov jetkizdi. Sonymen qatar basylymnyń jazýynsha, qalyptasqan dástúrge sáıkes juma kúni minberge kóterilgen ákim aımaqta atqarylyp jatqan jumystar jaıynda jan-jaqty baıandaǵan óńir basshysy jýrnalıster tarabynan qoıylǵan ótkir saaldarǵa da tuşymdy jaýap qaıtarǵan. Máselen, oblystyń burynǵy ákimi R.Berǵalıevke qatysty qoıylǵan saýalǵa oraı B.Іzmuhambetov: «Ketken ákimniń sońynan nashar áńgime aıtýdy durys kórmeımin. Burynǵy ákim bárin búldirdi, endi men túzep jatyrmyn dep te aıtýdan aýlaqpyn. Eger bulaı jalǵastyra beretin bolsaq, erteń biz aýysqannan keıin meni de jamandaýshalar shyǵady emes pe?! Al qarjy jetispeýshiligine baılanysty toqtap qalǵan nysandardyń sany 45-ti quraıdy. Munyń 10-na jergilikti bıýdjetten qarjy bólip, qaıtadan jalǵastyryp jatyrmyz. Qalǵan birqatar qurylysqa respýblıkalyq qazynadan qajetti qarajat berilip, bastalǵan isti sońyna jetkizý jumystary toqtaýsyz júrip jatyr», - depti. Maqala «Atyraýda jetimder úıi jabylyp jatyr» degen taqyryppen berilgen. Osy basylymda «Maqsat - aıqyn, murat - asyl» degen taqyrypta jarııalanǵan maqalaǵa keshe Almatydaǵy Dostyq úıinde shyǵarmashylyq qaýym ókilderi bas qosyp, «Nur Otan» partııasy Doktrınasynyń jobasyn talqylaýǵa arnalǵan jıyn arqaý bolǵan. Dóńgelek ústeldiń basyna partııa Tóraǵasynyń birinshi orynbasary Baýyrjan Baıbek, Mádenıet jáne aqparat mınıstriniń orynbasary Arman Qyryqbaev, Parlament Májilisiniń depýttary - Qazaqstan Prezıdenti janyndaǵy Adam quqyqtary jónindegi komıssııanyń tóraǵasy, «Nur Otan» partııasy janyndaǵy mádenıet pen ónerdi damytý máselelerine arnalǵan «Mıras» qoǵamdyq keńesiniń tóraǵasy Qýanysh Sultanov, Ulttyq ǵylym akademııasynyń tóraǵasy Murat Jurynov, «Astana opera» memlekettik opera jáne balet teatrynyń dırektory Tólegen Muhamedjanov, Senat depýtaty, Qazaqstan Jazýshylar odaǵynyń tóraǵasy Nurlan Orazalın, Qazaqstan kompozıtorlar odaǵynyń tóraıymy Balnur Qydyrbek, jazýshy, dramatýrg, memlekettik syılyqtyń laýreaty Ákim Tarazı jáne basqa óner men mádenıettiń kórnekti ókilderi, BAQ basshylary jaıǵasyp, ısi qazaqtyń yntymaqtastyǵyn, minez-qulqyn qalyptastyratyn rýhanııat pen mádenıet tóńireginde oı órbitti. «Nur Otan» partııasy Tóraǵasynyń birinshi orynbasary Baýyrjan Baıbek óz sózinde partııanyń saıası doktrına jobasynyń róli men mańyzdylyǵyna toqtaldy. Qazaqstan halqy Assambleıasynyń sessııasyndaǵy: «Halqymyzdyń basty prıntsıpi - qoǵamdyq kelisim bolýy tıis, ata-babamyzdyń dás­túrlerin saqtaı otyryp, biz birlik, toleranttylyq pen otansúıgishtiktiń úlgisin kórsete bilýimiz qajet» degen Elba­sy Nursultan Nazarbaevtyń sózi osy doktrınamen úndesip, úılesip tur. Partııa doktrınasynda da týra osy máseleler kóteriledi. Qoǵamdyq kelisim, yntymaqtastyq, salt-dástúrler, ulttyq qundylyqtardyń barlyǵy osy qujatta qamtylyp, saıasat pen ekonomıkanyń aldyna shyqty», - dep jazady basylym.