Atyraýda Jeńis kúni qarsańynda eki soǵys ardagerine 1 mln teńgeden berildi
Oblystyq ardagerler keńesi tóraǵasynyń orynbasary Serik Muhambetovtiń málimetinshe, qazir Atyraýda Ekinshi dúnıejúzilik soǵysqa qatysqan 2 maıdanger qalǵan. Onyń biri – bıyl 100 jasqa tolatyn Aıdyn Aıbarov, ekinshi maıdanger Zakarııa Sultanovtyń jasy – 96-da. Sondaı-aq, soǵys jyldarynda kontslager tutqynynda bolǵan bir adam bar. Al, tylda eńbek etkenderdiń sany – 1 919 adam.
«Atyraý qalasynda turatyn 2 maıdangerge 1 mln teńgeden qarjylaı kómek berildi. Sonymen qatar, ekinshi dúnıejúzilik soǵys kezinde fashıster men olardyń odaqtastary qurǵan kontslager tutqyny sanatyna jatatyn bir adamǵa 1 mln teńgeniń qoldaýy kórsetildi. Al, jeńiske úles qosqan tyl eńbekkeri sanatyndaǵy 45 adam 100 myń teńgeden birjolǵy aqshalaı kómek aldy. Soǵys jyldarynda jumys istep, alaıda, nagradtalmaǵan tyl eńbekkerleriniń taǵy bir tobyna – 1 874 adamǵa 30 myń teńgeden qarjylaı kómek berilip otyr», - dep habarlady oblystyq Jumyspen qamtýdy úılestirý jáne áleýmettik baǵdarlamalar basqarmasynan.
Basqarmanyń málimetine súıensek, sondaı-aq, áleýmettik qorǵalatyn sanatqa jatatyn 372 adamǵa 100 myń teńge kóleminde birjolǵy áleýmettik tólem berilgen. Onyń ishinde Aýǵan soǵysyna, Chernobyl AES-indegi apattyń zardaptaryn joıýǵa, Tájik-Aýǵan (315 adam) aýmaǵyndaǵy soǵys qımyldaryna, Iraktaǵy (5 adam) halyqaralyq bitimgershilik operatsııalarǵa, Taýly Qarabaqtaǵy (52 adam) etnosaralyq janjaldy retteýge qatysqandar bar.