Atyraýda jedel járdem úshin úsh qosalqy stansasy bar jańa ǵımarat salynady
Atyraý oblystyq densaýlyq saqtaý basqarmasynyń basshysy Qaısar Abdalıevtyń aıtýynsha, jedel járdem stansasy qyzmetin jańa ǵımaratqa kóshirý josparlanǵan.
«Turǵyndardyń saýlyǵyn saqtaýda alǵashqy medıtsınalyq jedel járdem qyzmetine basym baǵyt berilip otyr. Sol sebepten, atalǵan qyzmettiń sapasyn arttyrý maqsatynda medıtsına qyzmetkerlerine qolaıly jaǵdaı jasaý, jańa jedel járdem stansasyn jańa ǵımaratqa kóshiriledi. Bıylǵy jyldyń aıaǵyna deıin úsh qosalqy stantsııasy bar medıtsınalyq jedel járdem qyzmeti ǵımaratynyń qurylys-montaj jumystaryn bastaý josparlandy. Jańa ǵımarat 1 negizgi jáne 3 qosalqy stansadan turady. Negizgi ǵımarat Atyraý qalasyndaǵy I.Taımanuly dańǵylynda ornalasady. Al, qosalqy stansalar Mırnyı selosyndaǵy Ashhabad kóshesinde, Juldyz jáne Balaýsa shaǵyn aýdandarynda ornalasatyn bolady», -dep habarlady Qaısar Abdalıev.
Oblystyq qurylys basqarmasynyń basshysy Nurbergen Qusaıynovtyń málimetine súıensek, jedel járdem stansasynyń negizgi ǵımaraty úshin 1,98 gektar jer telimi bólingen.
«Jańa ǵımarattyń burynǵydan ereksheligi kóp. Jylyna 80 myń shaqyrtý qabyldaýǵa múmkindik jasalady. Turǵyndardan shaqyrtý qabyldaý jáne jedel járdem brıgadasyn basqarý, medıtsınalyq statıstıka, anyqtama bıýrosy, dárihana sekildi qyzmetter qosa atqarylady. Nysan qurylysyna jergilikti bıýdjetten 500 mln teńge qaralyp otyr», -dep málim etti Nurbergen Qusaıynov.
Eske sala ketelik, buǵan deıin Atyraý oblysynda aldaǵy aıda 6 medıtsınalyq nysan paıdalanýǵa beriletinin jazǵan bolatynbyz.