Atyraýda jedel járdem dárigeri «Jyl adamy» atandy
Atyraý qalasynyń ákimi Qaırat Orazbaev «Jyl adamy – 2021» baıqaýynyń jeńimpazyna arnaıy júldeni tapsyrdy.
Sondaı-aq, 14 atalymda jyl úzdikteri anyqtaldy.
«Baıqaýda «Jyldyń memlekettik qyzmetkeri», «Jyldyń mádenıet qyzmetkeri», «Jyl muǵalimi», «Jyl sportshysy», «Jyldyń quqyq qorǵaýshysy», «Jyl dárigeri», «Jyl qurylysshysy», «áleýmettik salanyń jyl qyzmetkeri», «jyl kásipkeri», «jyl jýrnalısi», «Jyldyń aýylsharýashylyǵy salasynyń qyzmetkeri», «Jyl depýtaty», «Belsendi depýtat» atalymynda úzdik atanǵandar marapattaldy. Máselen, «Úzdik jýrnalıst» atalymyna «Atyraý» gazetiniń sholýshysy Gúljan Ámirova ıe boldy. Al, Ǵasyr Lekerov – «Kommýnaldyq salanyń úzdik qyzmetkeri», oblystyq medıtsınalyq jedel járdem stansasy dırektorynyń orynbasary Nargız Baımoldaeva «Jyl adamy – 2021» baıqaýynyń jeńimpazy atandy», -dep málim etti qalalyq ákimdiktiń baspasóz qyzmeti.
Nargız Baımoldaevanyń medıtsına salasyndaǵy eńbek ótili – 11 jyl.
«Medıtsına salasynda jumys isteý ońaı emes. Aq halatty jandardyń basty mindeti – halyqtyń densaýlyǵyn qorǵaý. Ásirese, sońǵy eki jylda dárigerler men kishi býyndaǵy qyzmetkerlerdiń kásibı biliktiligi synaldy. «Basty baılyq – densaýlyq» degen qanatty sózdiń qadirin uqtyq. Naýqastardy aman alyp qalý úshin kúni-túni eńbek ettik. Qazir qaýipti vırýsqa qarsy vaktsına alý jolǵa qoıyldy. Sonyń nátıjesinde álemdi ábigerge salǵan indettiń taralýyn tejeı bastadyq», -deıdi «Jyl adamy – 2021» baıqaýynyń jeńimpazy Nargız Baımoldaeva.
Eske sala ketelik, buǵan deıin Atyraýda medıtsına qyzmetkerlerine «Halyq alǵysy» medali men páter berilgen bolatyn.