Atyraýda Jaıyqqa batyp bara jatqan sheteldik azamat qutqaryldy
Atyraý oblystyq Tótenshe jaǵdaılar departamentiniń qoǵammen baılanys tobynan málim etkendeı, oqıǵa 20 maýsymda bolǵan.
«Tótenshe jaǵdaılar departamenti sýdan qutqarý jasaǵynyń baılanys nomerine jergilikti ýaqytpen saǵat 14:20-da Atyraý qalasynyń turǵyny habarlasyp, Jaıyq ózenine er adam batyp bara jatqanyn aıtty. Er adam ózenniń arnaıy jabdyqtalmaǵan jerine shomylýǵa túsken. Ol sýdyń orta tusyna júzip baryp, keri orala almaǵan. Oqıǵa ornyna jedel qutqarý jasaǵynyń qutqarýshylary J.Armanov, E.Qalabaev pen S.Muhamedjanov jedel jetip, er adamdy qutqaryp, polıtsııa qyzmetkerlerine tapsyrdy», - dep habarlady departamenttiń qoǵammen baılanys tobynan.
Qutqarylǵan er adam Ózbekstan Respýblıkasynyń 55 jastaǵy azamaty ekeni anyqtaldy. Ol sýǵa alkogoldik ishimdik iship túsken.
«Atyraý oblysynyń turǵyndary men qonaqtaryna sý aıdyndaryndaǵy arnaıy jabdyqtalǵan jaǵajaılarda shomylý qajettigin eskertemiz. Mas kúıde shomylýǵa bolmaıdy. Qaıyqqa, ne kemege jaqyn jerde júzý qaýipti ekenin eskerý kerek. Júze almaǵan jaǵdaıda úrlemeli matras pen kamerany, ne arnaıy taqtalardy paıdalanbaǵan jón. Balalardy eresekterdiń qaraýynsyz qaldyrýǵa bolmaıdy», - dep málim etti vedomstvodan.
Eske salaıyq, budan buryn Atyraýda aǵaıyndy jasóspirimder Jaıyq ózenine batyp ketkenin habarlaǵan edik. Birer kúnnen soń olardyń biriniń denesi tabyldy.