Atyraýda Jaıyq ózenine bekire tuqymdas balyqtyń 100 myń shabaǵy jiberildi
Budan buryn Atyraýda balyq ósiretin zaýyt eksportqa qara ýyldyryq shyǵaratyny habarlanǵan bolatyn.
Bıyl «Caspian Royal Fish» JShS-niń toǵandarda bekire balyqtarynyń shabaǵyn ósire bastaǵan. Shabaqtar 3-10 gramǵa deıin ósirilgen. Oblystyq balyq sharýashylyǵy basqarmasynyń basshysy Artýr Sádibekulynyń aıtýynsha, bul – seriktestiktegi úsh toǵannyń birinen jiberilgen shabaqtar. Ózenge jiberilgen shabaqtyń sany 100 myńdy quraıdy.
«Mańǵystaý oblysynyń tabıǵat paıdalanýshylarymen kelisimshart jasalǵan bolatyn. Sonyń biri – «Aktaý-Balyk LTD» JShS Jaıyq ózenine bekire tuqymdas balyqtardyń shabaq jiberýge qoldaý bildirdi. Osylaısha, biz óńirdegi sý aıdynyn bekire tuqymdas balyqtardyń qorymen tolyqtyrýǵa úles qosýdy kózdedik», -deıdi basqarma basshysy Artýr Sádibekuly.
Atalǵan seriktestiktiń zaýytyna 2014 jyly Bashqurtstannan 15 myń bekire tuqymdas balyq ákelingen. Polshadan orys bekiresiniń 100 myń dana ýyldyryǵy alynyp, zaýyttaǵy basseınderde ósirilgen. Alty jylda balyqtardyń salmaǵy 8-9 kelige jetken.
Qazir seriktestiktiń zaýytynda baǵaly bekire balyqtarynyń tórt túri – orys bekiresi, súırik, qorytpa men sibir bekiresi ósiriledi. Arasynda 3-5 jyldan beri ósirilip jatqan balyqtar bar.
«Bizdiń seriktestikpen birneshe tabıǵat paıdalanýshy tyǵyz baılanys ornatqan. Onyń ishinde «Jýmamýratov K.E.», «Shabarov V.A.», «Samarov A.V.», «Invalıdy voıny v Afganıstane», «Mıkor», «Rozenko V.V.», «Tolqyn», «AN-grýpp», «Kolesnık S.V.», «Taýshyq aýyl sharýashylyǵy», «Batys Mýnaı Trans», «Isataı Opereıtıng Kompanı» jáne «Aktaý balyk kompanı» seriktestikteri bar. Búgin osy seriktestikter men oblystyq balyq sharýashylyǵy basqarmasynyń ókilderinen qurylǵan komıssııa músheleri shabaqtardyń sanyn eseptedi. Sodan soń, shabaqtar arnaıy turbamen aqqan sýmen Jaıyq ózenine jiberildi», - deıdi «Caspian Royal Fish» JShS-niń bas balyq ósirýshisi Ahat Nımatov.