Atyraýda Jaıyq ózenine batyp ketken er adam áli tabylǵan joq
Oblystyq tótenshe jaǵdaılar departamenti qoǵammen baılanys tobynyń aqparatyna qaraǵanda, búgin, 6 qańtarda saǵat 08:30-da muz astyna túsip ketken adamdy izdeý jumysy jalǵasqan.
Іzdeý jumystaryna tótenshe jaǵdaılar departamentiniń 9 qutqarýshysy, 2 tehnıka men bir qaıyq tartylǵan.
Bul oqıǵa keshe, 5 qańtarda Atyraý qalasynyń mańyndaǵy Jumysker eldimekeninde bolǵan. Jaıyq ózeniniń muzy oıylyp, eki er adam sýǵa túsip ketken.
Onyń biri – 49 jastaǵy er adamdy polıtsııa qyzmetkerleri men tótenshelikter qutqaryp qalǵan. Al, 1975 jylǵy er adam áli tabylǵan joq.
«Atyraý oblysyndaǵy sý aıdyndarynda byltyrǵy qysqy kezeńde 3 qaıǵyly oqıǵa tirkeldi. Byltyrǵy jeltoqsanda Jaıyq ózeninde qatqan muzdyń qalyńdyǵy 20-26 sm bolǵan edi. Al, qańtar bastalǵaly beri muz 16-18 sm-ge deıin juqardy. Ózennen balyq aýlaýǵa shyǵatyn turǵyndar muzdyń juqarǵanyn eskermeıdi. Osyndaı sebeppen bıylǵy 5 qańtarda Jaıyq ózenine barǵan eki adam muz astyna túsip ketti. Onyń biri qutqaryldy. Al, ekinshi adamdy qutqarý múmkin bolmady», -dep málim etti departament bastyǵynyń orynbasary, azamttyq qorǵaý polkovnıgi Asqat Erjanov.
Onyń aıtýyna qaraǵanda, muz ústindegi qaýipsizdikti qamtamasyz etý úshin 4120 ret reıd ótkizilgen. Turǵyndarǵa 8951 jadynama taratylǵan.
Jaıyq ózenine batyp ketken er adamdy izdestirý jumystary erteń, 7 qańtarda qaıta jalǵasady.
Budan buryn Atyraýda muz oıylyp, Jaıyqqa túsip ketken eki adamnyń bireýi qutqarylǵanyn jazǵan edik.
Foto: Atyraý oblystyq TJD