Atyraýda jataqhananyń qabyrǵalary jarylyp, stýdentter shuǵyl evakýatsııalandy
H.Dosmuhamedov atyndaǵy Atyraý ýnıversıtetinde stýdentterge arnalǵan 1114 oryndyq 3 jataqhana bar.
Sonyń biri – №2 jataqhana 1972 jyly salynǵan.
«Ýnıversıtettiń sharýashylyq bólimi 2022 jyldyń qarasha aıynda №2 jataqhanadaǵy birinshi qabattyń qabyrǵasynda aqaý paıda bolǵanyn anyqtady. Osyǵan baılanysty memlekettik satyp alý portaly arqyly jataqhananyń tehnıkalyq qaýipsizdigine saraptama júrgizýge konkýrs jarııalandy. Jeltoqsan aıynda konkýrsta jeńimpaz atanǵan «Qazkásiptik bilim» JShS atalǵan aqaýdy jóndeýge bolatyny týraly qorytyndy berdi. Ýnıversıtet tarapynan saraptamaǵa sáıkes 2023 jyldyń damý josparyna atalǵan jóndeý jumystaryn júrgizý engizildi», -dep habarlady ýnıversıtettiń basshylyǵy.
Keıin jataqhana qabyrǵasyndaǵy aqaý ulǵaıǵan.
Sol sebepten, ýnıversıtet basshylary stýdentterdiń ómirine qaýip týdyrmaý úshin Atyraý oblystyq memlekettik sáýlet-qurylys baqylaýy basqarmasyna hat joldap, saraptama jasaýǵa kómek suraǵan.
Basqarma júrgizgen saraptama qorytyndysyna sáıkes jataqhana ǵımaratyna kúrdeli jóndeý qajet.
«Osyǵan baılanysty bıylǵy 31 qańtarda №2 jataqhanada turatyn 560 stýdentti basqa jataqhanalarǵa ornalastyrý jumystary bastaldy. Qazir stýdentterdiń basym bóligi ýnıverstettiń, APEC kolledjiniń, Atyraý ınjenerlik-gýmanıtarlyq ınstıtýtynyń, S.Ótebaev atyndaǵy Atyraý munaı jáne gaz ýnıversıtetiniń jataqhanasyna ornalasty. Oqý ornymen jasalǵan kelisimshartqa sáıkes stýdentter jataqhanada oqý jylynyń sońyna deıin turady. Qalǵan stýdentterdi ornalastyrý boıynsha jumys jalǵasyp jatyr», -dep aqparat taratty H.Dosmuhamedov atyndaǵy Atyraý ýnıversıtetinen.
Oqý ornynda stýdentterge týyndaǵan suraqtarǵa ýaqytyly jaýap berýi úshin shtab qurylǵan. Arnaıy CALL ortalyq jumys isteıdi.
Eske sala ketelik, budan buryn Atyraýda mekteptiń elektr jelisinen aqaý shyǵyp, oqýshylar qashyqtan oqýǵa jiberilgenin jazǵan bolatynbyz.
Foto: AtyrauPress