Atyraýda jappaı tártipsizdikke qatysty 28 qylmystyq is tergelip jatyr
Budan buryn Atyraýda jappaı tártipsizdikten zardap shekken polıtseıdiń jaǵdaıy áli de aýyr ekenin jazǵan bolatynbyz.
Atyraý oblysy prokýrorynyń orynbasary Abzal Gılımnyń aıtýynsha, qazir arnaıy prokýrorlardyń basshylyǵymen vedomstvoaralyq jedel-tergeý toptary jappaı tártipsizdikke qatysty 28 qylmystyq isti tergep jatyr.
«Onyń ishinde terrorızm aktilerine qatysty 2, jappaı tártipsizdikterdi uıymdastyrý jáne qatysýǵa baılanysty 10, bılikti basyp alýǵa shaqyrý deregimen 1 qylmystyq is bar. Sondaı-aq, polıtsııaǵa qarsy kúsh qoldaný boıynsha 2, qarýdy urlaýǵa qatysty 1 qylmystyq is tergelip jatyr. Jappaı tártipsizdik kezindegi is-áreketter jazylǵan beınejazbalardyń barlyǵy zerdelendi. Zardap shekkender men kýálardan jaýap alyndy. Sot sanktsııasymen 25 adamǵa bultartpaý sharasy retinde qamaýǵa alý sharasy qoldanyldy. Bir adam úı qamaqta otyr», -dep habarlady Abzal Gılım.