Atyraýda jansaqtaý bólimine túsken 6 jasar balanyń mıy men ókpesi zaqymdanǵan
Atyraý oblystyq balalar aýrýhanasynyń baspasóz qyzmetinen málim etkendeı, 6 jasar bala travmatologııa bólimine aýystyrylǵan.
«Naýqas 24 shildede ártúrli jaraqatpen aýrýhananyń jansaqtaý bólimine túsken edi. Dárigerler oǵan «jabyq bas-mı jaraqaty men ókpeniń zaqymdanýy» degen dıagnoz qoıyp otyr. Qazir naýqastyń jaǵdaıy turaqtandy. Ol travmatologııa bólimine aýystyryldy. Aýrýhana dárigerleri naýqasqa qajetti em-dom sharalaryn júrgizip, jiti baqylaýǵa aldy», - dep habarlady aýrýhananyń baspasóz qyzmeti.
Eske sala ketelik, buǵan deıin Atyraýda samokatpen kólikke soqtyǵysqan 2 jasóspirimniń biri jansaqtaý bólimine túskenin jazǵan bolatynbyz.
Oblystyq polıtsııa departamentiniń baspasóz qyzmetinen málim etkendeı, jol-kólik oqıǵasy Atyraý qalasynda bolǵan.
«Jergilikti ýaqytpen keshki saǵat 21:15 shamasynda Ábilhaıyr han dańǵylymen samokatpen kele jatqan 2013 jáne 2017 jylǵy jasóspirimder Hyundai Accent markaly kóligimen soqtyǵysqan. Jol-kólik oqıǵasynan 6 jasar jasóspirim zardap shekti. Dene jaraqatyn alǵan jasóspirim jedel járdem brıgadasynyń kóligimen oblystyq balalar aýrýhanasyna jetkizilip, jansaqtaý bólimine jatqyzyldy», - dep habarlady departamenttiń baspasóz qyzmeti.
Sondaı-aq Atyraý oblysyndaǵy respýblıkalyq joldarda kólik apatynan 33 adam kóz jumǵanyn habarlaǵan edik.
Patrýldik polıtsııa rotasynyń komandıri, polıtsııa kapıtany Ádilbek Shahmetovtiń deregine súıensek, Atyraý oblysyndaǵy respýblıkalyq tas joldarda 38 jol-kólik oqıǵasy tirkelgen. Kólik apatynyń saldarynan 33 adam mert boldy. Al 57 adam ártúrli dene jaraqatyn alǵan.