Atyraýda Jambyl aqynnyń jeke buıymdary kóshpeli kórmege qoıyldy
Atyraý oblystyq tarıhı-ólketaný mýzeıinde Jambyl Jabaevtyń ádebı-memorıaldy mýzeıiniń uıymdastyrýymen «Uly jyraýdyń asyl murasy» atty kóshpeli kórme ótti.
«Jambyl aqynnyń shyǵarmashylyǵynyń 75 jyldyǵyna oraı 92 jasynda 12 bólmeli úı berilgen edi. Atamyz ómirden ótkenge deıin sol úıde turdy. Atamyz ómirden ótkenine eki jyldan soń sol úı Jambyl mýzeıine aınaldy. Atyraý jurtshylyǵynyń nazaryna usynylǵan kórmege aqyn atamyzdyń paıdalanǵan jeke buıymdaryn, dombyrasy men kıgen shapanyn, otbasylyq sýretterdi, ózge de qundy jádigerlerdi ákeldik. Úsh kún boıy atyraýlyq jurtshylyǵyna Jambyl aqynnyń ómiri men shyǵarmashylyǵynan mol maǵlumat usyndyq», - deıdi uly aqynnyń nemeresi Saltanat Jambylova.
Onyń aıtýynsha, aqynnyń ádebı memorıaldyq mýzeıi Almaty oblysynyń Jambyl aýdanyndaǵy Jambyl aýylynda ornalasqan. Al, Atyraýdaǵy kórmege qoıylǵan kóne jádigerdiń biri – Jambyl aqynnyń jas kezinde ustaǵan dombyrasy. Ulttyq aspaptyń shegi eshkiniń isheginen jasalǵan.
«Qazir aqynnyń urpaqtary Almaty oblysynda turady. Nemereleriniń biri – men Jambyl Jabaev atyndaǵy ádebı-memorıaldy mýzeıiniń dırektory bolsam, shóberesiniń biri osy mýzeıde qor saqtaýshysy bolyp jumys isteıdi. Biz úshin atamyzdyń eń qundy jádigeri – dombyrasy men shyǵarmashylyǵy. Atamyz dombyrasyn qolynan tastamaı, qazaqtyń ulttyq aspaby retinde qadir tutty», - deıdi Saltanat Jambylova.
Kórmeni tamashalaǵan jurtshylyqqa «Daryn» óner mektebi stýdııasynyń ónerpazdary «Dombyra» bıin oryndap berdi.
Oblystyq ardagerler keńesiniń tóraǵasy Murat Óteshov, Qazaqstan Jazýshylar Odaǵy Atyraý oblystyq fılıalynyń dırektory Qoıshyǵul Jylqyshıev, H.Dosmuhameduly atyndaǵy Atyraý ýnıversıtetiniń professory, fılologııa ǵylymdarynyń doktory Qadyr Júsip, Jambyl shyǵarmashylyǵyn zertteýshi ǵalym Aıkúmis Qydyrbaeva aqynnyń taǵylymdy ómir joly, jyraýdyń dúnıetanymy men murasy týraly áńgimeledi.
«Qazaqtyń ejelden kele jatqan ulttyń óneriniń biri – aıtys. Jambyl aqyn dál osy ónerdi keıingi urpaqqa jetkizip, ony meılinshe keńinen nasıhattady. Sol sebepten, aqynnyń shyǵarmashylyǵy áli de san qyrynan zerttelýi kerek», -deıdi Qazaqstannyń eńbek sińirgen qaıratkeri Qoıshyǵul Jylqyshıev.
Eske sala ketelik, budan buryn Atyraý mýzeıinde qos mereke qarsańynda ekspozıtsııalyq zaldar ashylǵan bolatyn.
Foto: Jambyl Jabaevtyń ádebı-memorıaldy mýzeıi