Atyraýda jalǵyzbasty 100 zeınetker shıpajaıda tegin em alady

ATYRAÝ. QazAqparat – Atyraýda 100 jalǵyzbasty zeınetker shıpajaıda tegin em alady. Respýblıka kúni qarsańynda oblystyq jumyspen qamtýdy úılestirý jáne áleýmettik baǵdarlamalar basqarmasy, óńirde jumys isteıtin kompanııa men «Atyraý shıpajaıy» AQ arasynda úshjaqty kelisimshartqa qol qoıyldy, dep habarlaıdy QazAqparat.

Kelisimshartqa sáıkese oblystyq jumyspen qamtýdy úılestirý jáne áleýmettik baǵdarlamalar basqarmasy em-domdy qajet etetin 100 jalǵyzbasty zeınetkerdiń tizimin usynady.

«Egde jastaǵy qarttarǵa qamqorlyq kórsetý maqsatynda jalǵyzbasty jáne áleýmettik jaǵdaıy tómen otbasyndaǵy ardagerlerge jergilikti shıpajaıǵa joldama berýdi jón kórdik. Óıtkeni, egde jastaǵy qarııalarǵa ózge aımaqtaqtarda ornalasqan kýrorttyq shıpajaılarǵa baryp-kelý ońaı emes. Sol sebepten, olar shıpajaılarǵa barýdan bas tartady. Osyny eskerip, «Atyraý shıpajaıy» basshylyǵy men jergilikti kompanııanyń birine usynysymyzdy bildirdik. Olar bul usynysymyzǵa qoldaý bildirip, 100 joldamaǵa qarjy bólýge sheshim qabyldady», -dedi basqarma basshysy Azamat Mámbetov.

Onyń aıtýynsha, tegin joldamamen qarıaılar balshyqpen, parafınmen emdelip, mıneraldy vanna, fızıoterapııa, emdik massaj jáne galoterapııa sekildi protsedýralardy alady.

Sondaı-aq tórt mezgil tamaq pen bir standartty bólmemen qamtý qarastyrylǵan.

Eske sala ketelik, budan buryn bıyl 3 myńǵa jýyq atyraýlyq múgedek shıpajaıda tegin emdelgenin habarlaǵan bolatynbyz.