Atyraýda jabyq ýchaskeniń birinde daýys berý aıaqtaldy
Atyraý oblystyq Qylmystyq-atqarý júıesi departamentiniń ÝG-157/1 mekemesinde №76 referendým ýchaskesinde daýys berý aıaqtaldy. Munda daýys berý úshin tergeýdegi 181 adam tirkelgen.
«Bizdiń mekemedegi tergeý ızolıatorynda 181 adamǵa daýys berý quqyǵyn paıdalanýǵa tolyq múmkindik berildi. Osy maqsatta mekemeniń akt zalyna daýys berýge arnalǵan arnaıy kabınalar jasalyp, bıýlleten salatyn jáshikter ornatyldy. Búgin, tańǵy saǵat 7:00-den bastap tergeýdegi azamattyń bári referendýmda daýys berýge nıet bildirdi. Olar jergilikti saǵat 9:30-ǵa deıin daýys berip úlgerdi», - deıdi ÝG-157/1 mekemesiniń bastyǵy Dýman Tájenov.
Oblystyq aýmaqtyq referendým komıssııasynyń málimetinshe, Atyraý oblysynda daýys berý quqyǵy bar 396 323 adam tirkelgen. Olar 261 referendým ýchaskesinde daýys berip jatyr. Onyń ishinde aýrýhanalar, ýaqytsha qamaý oryndary men áskerı bólimshelerde 11 jabyq ýchaske ashylǵan.
255 referendým ýchaskesinde pandýs bar. Bul ýchaskeler taktıldik belgilermen, kóz janarynda aqaýy bar adamdar aýdıonusqany tyńdaǵannan keıin bıýlletendi toltyrý úshin trafarettermen qamtylǵan.
«Atyraý qalasy men aýdandar ortalyqtarynda múmkindigi shekteýli jandarǵa 39 ınvataksı qyzmet kórsetedi. Al qulaǵy estimeıtin adamdar úshin 12 sýrdoaýdarmashy bar. Atyraý qalasynda, Jylyoı, Isataı, Qurmanǵazy, Qyzylqoǵa, Maqat aýdandarynda vahtalyq ádispen jumys isteıtin adamdardyń daýys berýin 43 ýchaskelik komıssııa uıymdastyryp jatyr», - dep málim etti aýmaqtyq referendým komıssııasynan.
Eske sala ketelik, buǵan deıin Atyraý oblysynda referendýmda daýys beretin 400 myńǵa jýyq adam tirkelip, Atyraý perzenthanasynda jas bosanǵan analar daýys bergenin habarlaǵan bolatynbyz.