Atyraýda vorkaýt-alańdary salynady

ATYRAÝ. QazAqparat – Atyraý oblysynda tozyǵy jetken 8 sporttyq-jattyǵý alańynyń ornyna jańa vorkaýt-alańdary salynady, dep habarlaıdy QazAqparat tilshisi.

Qaladaǵy keıbir sporttyq-alańdardyń ásirese, «Avangard» yqshamaýdanyndaǵy, Smaǵulov kóshesi men Jaıyq jaǵalaýynda ornalasqandarynyń ábden tozyǵy jetken. Osyny eskergen qalalyq turǵyn úı-kommýnaldyq sharýashylyǵy bólimi olardyń ornyna vorkaýt-alańdaryn salýdy qolǵa alǵan.

Mundaı alańdar barlyǵy 8 jerde paıda bolady. Olardyń alatyn aýmaǵy ártúrli – 150 sharshy metrden bastalyp 400 sharshy metrge deıin. Tıisinshe, aýmaqtaryna qaraı túrli sporttyq quraldarmen jabdyqtalady. «Jospar boıynsha, qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimine qarasty merdiger alańdardy salý úshin jerdi daıyndaý jumystaryn bastap ketti. Atalǵan jumystar jyl aıaǵyna deıin aıaqtalady dep kózdelgen», – dedi qalalyq TKSh bóliminiń baspasóz-hatshysy Ańsaǵan Saǵynbaeva. Bólim mamandarynyń aıtýynsha, vorkaýt-alańdary sporttyq-jattyǵý alańdaryna qaraǵanda, uzaq merzimge deıin tózimdi.