Atyraýda volonterler shtaby 5 baǵytty qamtıdy
22:18, 30 Naýryz 2020
ATYRAÝ. QazAqparat –Atyraý oblysynda qurylǵan volonterler 5 baǵytty qamtıdy, dep habarlaıdy QazAqparat.
«Atyraý qalasynda karantın men oblys aýmaǵynda shekteýlerdiń engizilýine baılanysty Azamattyq ortalyq bazasynda volonterler shtaby quryldy. Shtabqa qalanyń kez kelgen turǵyny erikti bola alady. Olar suranysqa ıe salalarda jumys isteıdi» -dep habarlady óńirlik kommýnıkatsııalar qyzmeti.
Volonterler shtaby bes baǵytty qamtyǵaly otyr. Máselen, avtoeriktiler turǵyndarǵa azyq-túlik pen dári-dármek jetkizýge qolǵabys jasaıdy. Medıtsına eriktileri jedel járdem qyzmetkerlerine, SES eriktileri dezınfektsııa jumysyna kómek beredi.
Eriktilerdiń bir toby polıtsııa qyzmetkerlerimen birge reıdke shyǵady. Sondaı-aq, erikti tiginshiler birneshe márte qoldanatyn medıtsınalyq maska tigýge atsalyspaq.