Atyraýda vaktsına saldyrǵandar sany 115 myńnan asty
07:21, 13 Shilde 2021
ATYRAÝ. QazAqparat – Koronavırýsqa qarsy vaktsınalardyń І komponentin 115 myńnan astam atyraýlyq saldyrdy, dep habarlaıdy QazAqparat.
Oblystyq densaýlyq saqtaý basqarmasy baspasóz qyzmetiniń aqparatyna súıensek, Atyraýda 1 aqpannan beri «Spýtnık V», «QazVac», «Hayat-Vax» vaktsınalarynyń I komponentin saldyrǵandar sany 115 019 adamǵa jetken.
Vaktsınanyń II komponentin 61 094 atyraýlyq alǵan.
«Keshe, 11 shildede qaýipti vırýsqa qarsy vaktsınanyń I komponentin 1 221 turǵyn saldyrdy. Vaktsına alǵandardyń qatarynda 43 pedagog, 32 dáriger, 11 stýdent, 7 memlekettik qyzmetshi, arnaıy mekemeniń 2 ókili, 1 polıtseı bar. Sondaı-aq, vaktsınany sozylmaly syrqaty bar 254 patsıent pen 871 jergilikti turǵyn ektirdi», - dep málim etti basqarmanyń baspasóz qyzmetinen.
Eske sala ketelik, buǵan deıin Atyraý oblysynda vaktsınanyń І komponentin alǵandar sany 113 myńnan asqan edi.