Atyraýda vaktsına alǵandar arasynda 1 mln teńgeniń utys oıyny ótedi

ATYRAÝ. QazAqparat – Atyraýda saýda ortalyǵy vaktsına alǵandar arasynda 1 mln teńgeniń utys oıynyn ótkizedi, dep habarlaıdy QazAqparat.

Buǵan deıin Atyraýda vaktsına saldyrǵan on adam 200 myń teńgeniń sertıfıkatyn utyp alǵan edi.

Endi «Baizaar» saýda oıyn-saýyq ortalyǵynyń ákimshiligi 1 mıllıon teńgeniń utys oıynyn ótkizýge uıǵarym jasap otyr.

Utys oıyny 1 shilde men 1 qyrkúıek aralyǵynda ótedi.

Oǵan qatysý úshin saýda ortalyǵyndaǵy vaktsınalaý beketinde vaktsına alý qajet.

Sodan keıin qatysýshynyń toltyrǵan kýponynyń ekinshi bóligi arnaıy lototronǵa salynady.

«Utys oıynyna osy saýda ortalyǵynda vaktsına alǵan turǵyndar ǵana qatysady. Al, 1 mln teńgelik qarjylaı júldeniń ıegeri 1 qyrkúıekte @baizaar_mall ınstagram paraqshasynda tikeleı efırde anyqtalady», - deıdi saýda oıyn-saýyq ortalyǵynyń ákimshiligi.