Atyraýda úzdik ýchaskelik polıtsııa beketine qyzmettik kólik berildi
QR Іshki ister mınıstri Erlan Turǵymbaevtyń tapsyrmasymen ýchaskelik polıtsııa
ınspektorlaryna avtokólikter bólindi. Sondaı qyzmettik kóliktiń biri Atyraý qalasyndaǵy №14 ýchaskelik polıtsııa beketine berildi. Olar «Úzdik polıtsııa beketi» ataǵyn ıelengen bolatyn. «Nıva» kóligin oblystyq polıtsııa departamentiniń bastyǵy, polıtsııa polkovnıgi Qamza Úmbetqalıev tabys etti.
«Memleket basshysynyń Joldaýyndaǵy tapsyrmalardy iske asyrý maqsatynda
ýchaskelik polıtsııa qyzmetkerleriniń mártebesin kóterý, olardyń ókilettigin keńeıtip,
materıaldyq-tehnıkalyq jaǵdaıyn jaqsartý qolǵa alyndy. Qazir halyqpen udaıy baılanysta bolatyn ýchaskelik ınspektorlar jumysynyń tıimdiligin arttyrýda materıaldyq-tehnıkalyq bazany nyǵaıtý júrgizilýde. Memleket tarapynan azamattardyń qaýipsizdigin qamtamasyz etip, jedel áreket etý úshin polıtsııa qyzmetkerlerine barynsha qoldaý kórsetilýde», - dedi departament bastyǵy Qamza Úmbetqalıev.
Atyraý qalasyndaǵy №14 ýchaskelik polıtsııa beketiniń ınspektorlary 48 myńǵa jýyq
turǵyny bar «Nursaıa», «Bolashaq», «Jeti qazyna», «Tulpar», «Jeruıyq» yqshamaýdandaryndaǵy qoǵamdyq tártipti qadaǵalaıdy. Munda jańa salynǵan kópqabatty jáne jeke turǵyn úıler, sporttyq kesheni, iri kolledj, Nazarbaev zııatkerlik mektebi, úsh orta mektep, aýrýhana, birneshe kóńil kóterý orny sekildi nysandar bar. Osy aýmaqtaǵy ýchaskelik polıtsııa beketi de planshettermen, vıdeotirkegish, baılanys quraldarymen qatar, ákimshilik aýmaqtaǵy aýlalar men basqa da qoǵamdyq oryndar vıdeobaqylaý kameralarymen jabdyqtalǵan.
«Men 2014 jyldan beri ýchaskelik polıtsııa qyzmetkeri bolyp qyzmet atqaramyn. Ǵımaratymyz 2018 jyly paıdalanýǵa berildi. Endi mine, jańa kólikke ıe boldyq. Bul bizdiń shaqyrtýlarǵa jedel jetýimizge múmkindik beredi», - deıdi aǵa ýchaskelik polıtsııa ınspektory, polıtsııa kapıtany Rústem Jumabaev.
Departament bastyǵy Qamza Úmbetqalıevtiń aıtýynsha, Atyraý qalasyndaǵy 27 ýchaskelik polıtsııa beketinde 90-nan astam ýchaskelik polıtsııa ınspektory men 30-dan asa olardyń kómekshisi qyzmet atqarady.