Atyraýda úı alyp berem dep birneshe adamdy aldaǵan alaıaq áıel 37 aıǵa sottaldy
Atyraý qalalyq polıtsııa basqarmasynyń tergeýshisi, polıtsııa aǵa leıtenanty Nurbolat Ersultannyń málimetinshe, jergilikti azamatsha birneshe adamdy aldaǵan.
«Aldymen byltyrǵy tamyzda tanysyna Atyraý qalasyndaǵy Nursaıa shaǵynaýdanynan 3 bólmeli páter alyp berýge ýáde etip, 800 myń teńge aqshasyn alǵan. Keıin qarashada taǵy bir azamatshamen tanysyp, oǵan da 4 bólmeli páter alyp beremin dep 495 myń teńgesin alǵan. Budan soń bıylǵy qańtarda WhatsApp jelisinde jer teliminiń jarnamasy arqyly jergilikti azamatpen tanysqan. Sol azamatqa «Samal» shaǵyn aýdanynan jer telimin alýǵa kómektesý úshin 750 000 teńge suraǵan» -deıdi Nurbolat Ersultan.
Onyń aıtýynsha, alaıaq áıelge qatysty QR Qylmystyq Kodeksiniń 190-babynyń 3-bóligi, 4-tarmaǵymen tergeý amaldary júrgizilip, is sotqa joldandy.
Sot sheshimimen alaıaq áıelge 3 jyl 1 aıǵa bas bostandyǵynan aıyrý jazasy taǵaıyndaldy. Sottalýshy jábirlenýshilerge kelgen zalaldy ótep berýi tıis.
«Tómen baǵamen, nemese kezekten tys úı alyp beremin degen alaıaqtar kóbine ózin memlekettik qyzmetshi retinde tanystyryp, jábirlenýshilerdiń senimine kiredi. Tipti bolashaqta alatyn úıdi kórsetedi. Ózge adamdarǵa osyndaı úı alyp bergeni týraly ótirik aıtady. Mundaı alaıaqtardyń qurbany bolmas úshin ákimshilikke ne bolmasa «Azamattarǵa arnalǵan úkimet memlekettik korporatsııasy» KEAQ jergilikti fılıalyna júginý qajet. Sondaı-aq, aldyn ala tólem jasaýǵa jol bermegen jón» - deıdi Nurbolat Ersultan.
Eske sala ketelik, budan buryn Atyraýda 20 jastaǵy alaıaq úsh jyl boıy májbúrli eńbekke tartylatynyn jazǵan edik.