Atyraýda úsh jyl turǵan sheteldik jasóspirim dombyra úırenip aldy
Radek esimdi sheteldik jasóspirim Ońtústik Afrıka Respýblıkasynyń Keıptaýn qalasynda týǵan. Keıin ata-anasynyń jumys babymen Qazaqstanǵa kelip, Atyraýda úsh jyl turǵan.
«Qazaqstanǵa kelgenge deıin AQSh pen Polshada turdyq. Qazaq halqynyń ulttyq kıimi men taǵamdary, ulttyq aspaby – dombyra qatty unady», - deıdi sheteldik jasóspirim.
Ákesi Haımısh Polstyń aıtýynsha, onyń otbasy Atyraýǵa 2017 jyly kelgen. Ózi osyndaǵy sheteldik kompanııada jumys isteıdi.
«Radektiń mýzykaǵa qushtarlyǵyn baıqap, dombyra shertýdi úırengenin qaladyq. Biz qaı elde tursaq, sol eldiń mádenıetine qyzyǵýshylyq tanytamyz. Sol sebepten, ulyma dombyra satyp alyp berdim», - deıdi Haımısh Pols.
Sheteldik jasóspirimge dombyra úıretken ustazy – Jańylhan Ǵalymqyzy. Onyń sózinşe, Radek demalys kúnderi bir, ne eki ret dombyra úırenýge kelip turǵan. Osylaı 6-7 aıda dombyra shertýdi meńgerip alǵan. Qazir 4-5 kúıdi jańylmaı oryndaıdy. Ásirese, Qurmanǵazynyń shyǵarmalaryn oryndaǵandy unatady. Sonyń ishinde «Adaı» men «Kelinshek» kúıleri bar.
«Byltyrǵy jyldyń sáýirinde pandemııaǵa baılanysty Polshaǵa baryp, Qazaqstanǵa qaıta orala almadyq. Qazir dombyra shertýdi úıretken ustazymnan ár jeksenbi saıyn Skype arqyly dáris alyp júrmin. Polshada qazaqtyń uly aqyny Abaıdyń «Kózimniń qarasy» týyndysyn úırendim. Qazaqstan halqyn Naýryz merekesimen quttyqtap, 2021 jyl baq-bereke ákelsin dep tileımin», - deıdi Radek.
Eske salaıyq, buǵan deıin Atyraýda sheteldik kompanııa qyzmetkerleri túski úziliste asyq oınaıtynyn jazǵan edik.