Atyraýda úsh kólikten 100 keliden astam bekire tuqymdas balyq tabyldy
Oblystyq polıtsııa departamenti baspasóz qyzmetiniń málimetinshe, baǵaly balyqty aýlaýǵa jáne zańsyz tasymaldaýǵa tyıym salý úshin «Bekire – 2022» keń aýqymdy is-sharasy ótip jatyr.
«Krımınaldyq polıtsııa basqarmasynyń qyzmetkerleri «Nissan Teana» avtokóliginiń júrgizýshisi men jolaýshylary bekire tuqymdas balyqty tasymaldap júrgeni týraly jedel aqparatty tekserdi. Nátıjesinde atalǵan avtokólikten 81,4 keli bekire tuqymdas balyq tárkilendi. Baǵaly balyqty zańsyz tasymaldaǵan júrgizýshisi men eki jolaýshysy ustalyp, qamaýǵa alyndy. Al, Qaraózek aýyly tusynda toqtatylǵan «Toyota Camry» kóliginen 20 kelige, Balyqshy kentinde tekserilgen «Vaz-2110» kóliginen 15 kelige jýyq bekire tuqymdas balyq tabyldy. Atalǵan derekterge qatysty Qylmystyq kodekstiń 339-babynyń 2-bóligimen sotqa deıingi tergeý júrip jatyr», -dep habarlady departamenttiń baspasóz qyzmeti.
Ózge aqparat Qylmystyq-protsestik kodekstiń 201-babyna sáıkes jarııalaýǵa jatpaıdy.
Eske sala ketelik, buǵan deıin Atyraý oblysynda 100 kelige jýyq bekireni zańsyz tasymaldaǵan er adam ustalǵanyn habarlaǵan edik.