Atyraýda ulttyq qyzdar mektebi sot sheshimimen jabyldy

ATYRAÝ. QazAqparat – Atyraýda 7-synyp oqýshylaryn lıtsenzııasyz oqytqan qyzdar mektebi jumysyn toqtatty, dep habarlaıdy QazAqparat tilshisi.

Atyraý oblysynyń mamandandyrylǵan aýdanaralyq ekonomıkalyq sotynda «Qazaq ulttyq qyzdar mektebi» JShS qyzmetin toqtatý jóninde azamattyq is qaraldy.

Talap aryzdy Atyraý oblysynyń bilim salasyndaǵy sapany qamtamasyz etý departamenti bergen.

«Qazaq ulttyq qyzdar mektebi» JShS zańdy tulǵa retinde 2022 jylǵy 18 maýsymda Azamattarǵa arnalǵan úkimette tirkelgen. Qyzmetin lıtsenzııalaýdy talap etetin bilim berý qyzmetiniń kishi túri dep kórsetken. Alaıda, mektep óz qyzmetin Atyraý qalasynda 2022-2023 oqý jylynyń 1 qyrkúıeginde 7-synypqa 117 balany qabyldap, jeke bilim berý uıymy retinde bastaǵan. «Qazaq ulttyq qyzdar mektebi» JShS tarapynan Qazaqstan Respýblıkasynyń bilim salasyndaǵy zańnamasyn buzýǵa, atap aıtqanda, lıtsenzııa bolmaǵan kezde qyzmetti júzege asyrýǵa jol berildi», -dep habarlady sottyń baspasóz qyzmeti.

Sottyń sheshimimen departamenttiń talaby qanaǵattandyryldy. «Qazaq ulttyq qyzdar mektebi» JShS-niń bilim berý qyzmeti toqtatyldy.

Sot aktisi zańdy kúshine engen joq.

Eske sala ketelik, buǵan deıin Atyraýda birneshe mekteptiń oqýshylary jóndeý jumysyna baılanysty ózge bilim ordasynda oqıtynyn habarlaǵan edik.

Atyraý qalalyq bilim bóliminiń asshysy Aınagúl Dúısekenovanyń málimetinshe, 5 mektepte jóndeý jumystary júrgizilýine baılanysty oqýshylardy ózge bilim ordalarynda oqytý kózdelip otyr.

Sondaı-aq, keshendi tekserýden keıin Y.Altynsarın, S.Muqanov jáne M.Lomonosov atyndaǵy mektepteriniń ǵımaraty apattyq jaǵdaıda ekeni anyqtalǵan.

Sol sebepten, atalǵan bilim ordalarynyń oqýshylary ózge mektepterde oqıdy.