Atyraýda turmystyq qaldyq shyǵarý tarıfi úsh esege jýyq ósýi múmkin
Qazir Atyraý qalasynyń turǵyndary turmystyq qaldyq shyǵarý qyzmeti úshin bir adamǵa 205 teńge tóleıdi. Endi bul tarıf úsh esege jýyq ósip, 594 teńgege jetýi múmkin.
Atyraý qalalyq qoǵamdyq keńesiniń otyrysynda kommýnaldyq qaldyqtardyń túzilý jáne jınaqtalý normalaryn bekitý máselesi qaraldy. Qalalyq turǵyn úı-kommýnaldyq sharýashylyǵy, jolaýshylar kóligi jáne avtokólik joldary bóliminiń basshysy Álibek Muhanbetalıevtyń aıtýynsha, «Arnaýly avtobaza» JShS 2006 jylǵy bekitilgen tarıf negizinde qyzmet kórsetedi. Endi jaıly turǵyn úı (kópqabatty) turǵyndaryna bir adamǵa
527,83 teńge, jaıly emes turǵyn úı turǵyndary úshin bir adamǵa 594,36 teńgege kóterý usynylyp otyr.
«Arnaýly avtobaza» JShS dırektory Almas Іztileýovtiń pikirinshe, turmystyq qatty qaldyqtardy jınaýǵa, tasymaldaýǵa jáne kómýge arnalǵan tarıfterdi bekitýde barlyq shyǵyndar eseptelgen. Tarıfti kóterýge ınflıatsııa, qosalqy bólshekter men janarmaıdyń, qolǵap, sypyrǵysh sekildi buıymdardyń qymbattaýy sebep bolǵan. Birneshe sanattaǵy adamdarǵa usynylatyn jeńildikter bar. Máselen, soǵys ardagerlerine 100%, soǵysqa qatysýshylarǵa teńestirilgenderge, kópbalaly analarǵa, birinshi jáne ekinshi toptaǵy múgedektigi bar turǵyndarǵa 50% jeńildik beriledi. Ataýly áleýmettik kómek alatyndar men jasyna baılanysty zeınetkerlerge 25% jeńildik qarastyrylǵan.
Alaıda, Atyraý qalalyq máslıhatynyń depýtattary men qoǵamdyq keńes músheleri usynylǵan tarıfti bekitý máselesin bir aptaǵa keıinge shegerdi.
Eske sala ketelik, budan buryn Atyraýda monopolıst aýyz sý tarıfin 100 paıyzǵa kóterýdi surap otyrǵanyn jazǵan edik.