Atyraýda túrli tústi metaldy zańsyz qabyldaıtyn oryndardy jabý kózdelýde

ATYRAÝ. QazAqparat - Atyraýda qara jáne túrli tústi metaldy zańsyz qabyldaıtyn oryndardy jabý kózdelýde, dep habarlaıdy QazAqparat tilshisi. 

Turǵyn úılerden metall buıymdardyń urlanýy jıilegenine baılanysty shaǵymdar kóbeıip ketkendikten qalalyq ákimdik zańsyz metall qabyldaý qyzmetin anyqtap, joıýdy qolǵa almaq nıette. 

Qalalyq ákimdikte ótken apparat jınalysy barysynda kommýnaldyq qyzmet qala basshysyna metall buıymdardy urlaıtyndardyń áreketin aıtyp shaǵymdandy. 

Atyraý qalalyq «Turǵyn úılerge kommýnaldyq qyzmet kórsetý» JShS dırektory Zúlqaǵıda Naýbekovtiń aıtýynsha, qaskúnemder Nursaıa yqshamaýdanyndaǵy

№14a úıdiń alty lıftisiniń metall arqany men qozǵaltqyshyn urlap, isten shyǵarǵan.

«Buzaqylardyń kesirlerinen turǵyndar japa shegip otyr, olardyń arasynda ózdiginen joǵary qabatqa kóterile almaıtyn zeınetkerler men múgedekter de bar. Urylar onymen qosa podezderdegi batareıalardy, metall buıymdardy da qoldy qylǵan. Ońaı oljaly bolǵysy keletinder urlaǵan metaldardy qara jáne túrli tústi metall qabyldaıtyn oryndarǵa tapsyrady», - deıdi Zúlqaǵıda Naýbekov.

Qala ákimi Alımuhammed Quttumuratulynyń aıtýynsha, oblys ortalyǵyndaǵy barlyq metall qabyldaý oryndary ıeleriniń kásiptik osy túrimen aınalysýyna berilgen lıtsenzııasyn tekseretin reıd júrgizý kerek. Jumys tobynyń quramyna quqyq qorǵaý organdarynyń, salyq departamentiniń ókilderi, depýtattar men qoǵamdyq keńes músheleri engizilýi tıis. 

«Eger mundaı bólimshelerdiń ıeleriniń tıisti lıtsenzııalary bolmasa, aýmaqtarynda jınalǵan barlyq metaldardy tárkileý kerek, óıtkeni zańsyz bıznestiń kesirinen adamdar zardap shegip otyr. Biz óz tarapymyzdan metaldy tıeıtin tehnıkany beremiz», -dep málim etti qala basshysy. 

Alımuhammed Quttumuratulyna, sondaı-aq, káriz qudyqtarynyń shoıyn qaqpaqtaryn urlaý kóbeıip ketkeni týraly da aıtyldy. Olar qara jáne túrli tústi metall qabyldaý oryndarynan tabylyp jatady. Bul problemany sheshýdiń balamaly joly retinde qaladaǵy barlyq temir qaqpaqtardy rezına nemese beton túrlerine aýystyrý usynyldy.